تاکسي/ يازار: احمد اونال چم
يازار: احمد اونال چم
كؤچورن: عيوض (ائيواز) بيات
تاکسيسي ايله جادا ايشيقلاري آلتيندا يول آليردی. «ايکي-اوچ موسافیر داها بولورسام ائوه دؤنوب یاتاجاغيم.» دييه دوشوندو، يورقوندو. تاکسيسينه بيرآن سئوگييله باخدي، ميريلداندي؛ «چؤرك آختاران» گؤزو اؤنجه يولدا سيزميش بير سرخوشا سونرا دا زيبيللري قاريشديران بيرينه تاخيلدي. اؤزونو اونلا قيياسلادي سئويندي؛«ايييسن، ايييسن!»
ساعاتينا باخدي، بير اوف چئکدي، «بير موسافیر چيخسا آرتيق، بوشونا دولانيب دورورام.» ائرتهسي گون آبيسينین[1] یانینا گئدهجکدي، تئز قالخاجاغي ايچين، ائوينه تئز دؤنمک ايستييیردی. فقط هرشئي اينسانين ايستهديیي کيمي گئتميردی کي. ايچينده خفيف بير اؤفکه ايله آبيسيني دوشوندو؛ «آه!. . آبي، بيراخمادين بو قوماري، بورجلانيرسان، طبیعیکی ياخانا ياپيشير تفهجيلر[2].»
بير داها دريندن اووفف چئکدي، «گرچي پارا[3]يي بو گون تاپ دئييردین آما اولمادي، صاباح بورج-خرج پارايي بولوب سني تفهجيلردن قورتاراجاغيم آما بئله داوام ائدرسن مني ده ياخاجاقسين، عائیلهني ده!»
تام بؤيله دوشونجهلره دالميشکن تالي يولدان چيخان بير آدامين ال ساللاديغيني گؤردو، سئويندي. تاکسيسييله همن آدامين اؤنونده دوردو. آدام تاکسييه ميندي و تلاشلا آنلاتمايا باشلادي؛ «لوطفن عجله ائدين، بو آرا کوچهده» تاکسيجي راحاتسيزلانان بيريني آلاجاقلاريني ظنائتدي آما آدام دانیشمايا دوام ائتديکجه جاني سيخيلدي؛ «آمان آللاهيم، قورخونج بيرشئي، بير آدامي دؤرت يئريندن پيچاقلاميشلار. آدام هاردايسا چوخ قان وئرمهدن اؤلهجک. کيمسه يارديم ائتمير، هرکس توپلانميش باخیر. نه قدر دويغوسوز، اومورساماز[4] بير توپلوم اولدوق، يالنيز باخیرلار!»
تاکسيجينين جاني سيخيلدي؛ «آرابا[5]م قان ايچينده قالاجاق.» دييه دوشوندو. آیری آدام دوام ائديردی؛ «هله ايکي آرابا يارالييي آلمايينجا شوک اولدوم، هله اينانا بیلمیرم. دوشونه بيلير میسینیز؟ بير آدام قان وئرمهدن اؤلمک اوزره و ايکي آرابا قازا باسيب گئدير. دوشوندوکجه دلي اولورام. ها گلديک، يارالي اولان بو کالاباليغين[6] ايچينده» تاکسيجي يوموشاق بير سسله «هادي سيز ياراليني گتيرين، من ده آرابانين اوزونو چئويريم كي گئج اولماسين». «تامام» دييهرک آدام ايندي، قالاباليغين آراسينا قاچدی، باغيردي؛ «یول وئرین، یول وئرین تاکسي گلدي.» آما داها يارالينين يانينا گلمهدن اوزاقلاشان آرابا سسييله ايرکيلدي[7]، هيزلا دؤندو؛ پلاکاسي گؤرونمهسين دييه ايشيقلاريني سؤندورموش حالدا تاکسينين هيزلا اوزاقلاشديغيني گؤردو. ايچينده بير شئيلرين قوپتوغونو حيسس ائتدي، آغلار کيمي بير سسله اينلهدي؛ «يا رببيم!... . يا رببيم!... . نه اولدو بيزه، نه اولدو؟» اولدوغو يئره اومودسوزجا چؤمبَلدي.
تاکسيجي ديکيز[8] آيناسيندان دالييا سون بير يول باخدي، باغريشمالارا کوفورلره آلديرمادان تکرار قازا باسدي. «منه نه، ايشين يوخسا يارالييي گؤتور، آرابايي ميندارلا ... باشقا تاکسي مي يوخ؟ نئجه اولسا ايندي بيری تاپیلار.» ويجدانيني دا سوستوردوقدان سونرا جئبيندن چيخارديغي يابانجي سيگارادان بيرینی اودلادي. سونرا کندينجه بير ائسپيري ياپدي؛«هم ايشين نه تا بورالاردا؟ ريجا ائتسيدين[9] قاتيللردن، سني خستهخانا اؤنونده فيلان پيچاقلاسالاردي.» گؤزو اليندهکي سيگارايا تاخيلدي؛ «اولان بيز دوغرودان دالي قالميش اولکهييز به، آداملار اؤز اؤلکهلَرينده چوخ مکاندا ياساقلييیرلار بو مئراتي، بيزيم ياساقلاماميزا اجازه وئرميرلر. اه اونلاردا حاقلي، اونلارين اينسانلاري گؤزونو آچميش، بيز ده عاقيللانساق هارایا ساتاجاقلار. اولان، سيگارالار بو قدر باهالی ايکن تارلادا پامودورونو مين ليرهيه ساتابيلمهينلر وارميش.» سونرا کئييفله بير نفس داها چئکدي، «ايچ آسلانيم، ايچ آمئريکايا سنين ده يارديمين اولسون.»
ال ساللايان بير موسافیر گؤرونجه دوشونجهلريندن سييريلدي. «- هه، موسافیر دئديیين بئله قيليغي دوزگون اولاجاق، باغيشلاماق قيليغيندان ياغير.»
تاکسيجي او گئجه بير سوره داها چاليشديقدان سونرا ائوينين يولونو توتدو. ايچي حوزور دولو ائوينه ياخینلاشميشدي کي ائوينين اؤنونده گؤزلهیَنلر اولدوغونو گؤردو. مراکلاندي[10]. آراباسيني گاراژا چئکيب داها سونرا نه اولدوغونو اؤیرنمک ايستهدي آما بير قونشوسو اونو دوردوردو؛ «- ايستَرسن آراباني يئرلشديرمه، لازيم اولابيلير.» شاشکين ايندي، قاپينين اؤنونده آغلاشان خانيمي و اوشاقلارينا ياخینلاشدي؛ «- نه اولوب؟» خانيمي آغلاياراق بوينونا ساريلدي؛ «- آبين اؤلدو.»
باشدان آياغا تيترهدي، «- آبيم مي؟ . . . ناسيل؟»
«- پيچاقلاميشلار، قان چوخ الدن وئرمهدن اؤلموش.» تاکسيجينين ايچي قورخويلا سارسيلدي؛ «- هاردا، نه زامان؟» خانیمینين جوابييلا ييخيلدي. گؤزونو يوماراق قاچديغي كوچه و قالاباليق جانلاندي؛ قالاباليغين ايچيندن قانلار ايچينده تانيديق بير اوزون اؤزونه باخديغيني گؤرور کيمي اولدو. هوش دان گئديب يئره ييخيلدي ... .
[1]- بؤیوک قارداشینین
[2]- ربا خوار، نزول خوار
[3]- پول
[4]- بیخیال
[5]- اتومبیل
[6]- تجمّع اون، شولوق لوغون.
[7]- فارسجا: يكه خورد.
[8]- ماشینین قاباق شوشهسیندن دالی یا باخیلان آینا.
[9]- خواهش ائتسَيدين.
[10]- نگران شد.
http://www.cobanyildizi.blogfa.com/post-8.aspx
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.