آغری / جاويدان
يازار: جاويدان
كؤچورن: عيوض بيات
آغري ...
قادين آغري چکيردي.
سانجيلاري هر يئني دالغادا داها گوجلو و داها اوزون اولوردو.
قادين بو سانجيلارين آراسينداکي گئتديکجه قيسالان فاصيله لرده مومکون قدر دريندن نفس آلماغا چاليشير، آلاقارانليق و هيسلي اوتاغين يوخسوللوقلا دولو هاواسيني آجگؤزلوکله جييرلرينه چکير، گؤزلريني دولانديريب اوتاغين بير کونجونده ننه سينه قيسيلميش، اطرافيندا باش وئرنلردن هئچ نه آنلاماياراق قورخودان رنگي قاچميش اوغلان اوشاغينا باخيردي.
- آي آللاه..کؤمگيني اسيرگمه..کؤرپمه، اريمه يازيغين گلسين، بيزي تک قويما، آي آللاه .. آي آللااههه ... آاااييييي ... آياللااااااههه ...
- سويو سحردن گئديب، -دئييردي ماماچا.- اون ساعاتدي سوسوزدو اوشاق، آللاه اؤزو کؤمک اولسون. بلکه آپاراق خستخانايا، هه؟!- اوميدسيزليکله اونا باخدي.
- يوخ، حکيم لازيم دئييل...-دئدي او.
- منه دئييردي سويو گئديب، اينانماديم، دئديم بلکه آغيردي، سيدييه چيخيب، هيسس ائله مه ييب، واختينا بير آي قالميشدي آخي، -قايناناسي اونا قيسيلميش اوغلان اوشاغي نين آياقليسيني يوخلاييب باتيق اولدوغونو گؤردو و اودون پئچي نين بؤيروندن آفتاوا-ليه ني گؤتوروب اوشاغي يوماغا باشلادي
داها بير سانجي دالغاسي گلدي.
قادين بوتون ووجودونو سارميش بو دهشتلي آغريدان باشقا يئر اوزونده هئچ نَيي و هئچ کيمي هيسس ائلميردي... يالنيز بو آغري واردي دونيادا، بير ده قادي نين اؤزو. داها هئچ کيم و هئچ نه.
ساچلاريندان توتموش آياق ديرناقلارينادک آغراييردي و بو آغري اونون جانيندان ذره-ذره قوپاراق کائيناتين هر بير نوقته سينه ياييليردي. آرامسيز قيشقيريردي و بو قيشقيريغين اکس-سداسي(قاييديش سسي) کائيناتين هر بير نوقته سينده ائشيديليردي.
ساچلاري باليشين اوزرينه سپلنميشدي، آلنيندا، بوينوندا تر دامجيلاري پاريلداييردي.
او، غئيري - ايختيياري اللرييله ساچلاريني آرخايا دارادي، بير نئچه آنليق قولاقلاريني سيخيب گؤزلريني يومدو، آلنيندا، بوينوندا پاريلدايان تر دامجيلاريني اللري نين ايچي ايله سيلدي، حالسيزلاشديغيني، گوجونون و صبري نين توکنديگيني، بو يئري-گؤيو سارميش آغرييا تاب گتيرميه رک بو آلاقارانليق و هيسلي اوتاغين يوخسوللوقلا دولو هاواسيندان، بو پيللکنلري سيديک قوخويان کؤهنه و روطوبتلي بينادان اوزاغا، مومکون قدر اوزاغا قاچماق ايسته ديگيني هيسس ائله دي.
آما هارا؟
آغري هر يئرديدي.
باشقا، تانيماديغيميز، يئريني بيلمه ديگيميز، بلکه ده هر بيريميزين واختيله اولوب ايندي هئچ بيريميزين خاطيرلاماديغي بير دونيادان ياشاديغيميز، آغريديغيميز دونيايا داها بير اينسان گليردي.
آغريسي اؤزوندن اول دوغولموشدو يئر اوزونه...
او، بو اوشاغي ايللر ايدي کي، گؤزله ييردي. بو آغريني نه قدر آرزولاميشدي. بو آغريني چکن قادينلارا هسد آپاريب آغريسيزليغا محکوم اولدوغوندان اوتانيب يئره گيرميشدي هر دفعه. سيزيلداميشدي، يانيب- ياخيلميشدي آغريدان محروم اولدوغونا گؤره. آغريميشدي آغريسيزليغيندان ... گئجه لر بويو دوعالار اوخوموشدو، گوندوزلر بويو زيارتگاهلارا آياق دؤيموشدو، سايسيز- حسابسيز جينسي علاقه لردن اري ده بئزيکميشدي، بيتمز- توکنمز موعاليجه لردن اؤز جاني دا يورولموشدو .. آما بوتون بونلار هر 28- اينجي گون تامام اولوب آي بديرلنديمي، بير اوووج قانا دؤنوب اوميدلريني محو ائديردي.
بنده لر عاجيز ايدي.
آللاهسا سوسوردو.
دقيق امين ايدي کي، آللاهين بيرجه دفعه اوزونو اونا چئويريب ديلوجو " اول! " [OL] دئمه سي کيفايت ائدر آغريسيزليقدان قورتولماسينا.
دونيا، کائينات بو بيرجه سؤزدن يارانماديمي؟
بس اونون بطنينده نييه بو نهايتسيز حياتدان بيرجه ذره بئله جوجريب دوغولا بيلميردي، نييه؟
آخي او دا دويماق ايسته ييردي آغريني.
بو دادي هيسس ائتمهدن مي کؤچهجکدي يئر اوزوندن؟
بس آللاه؟
بس " اول! " کلمه سي؟
اؤنجه سؤز واردي آخي؟!
سونرا دونيا يارانميشدي.
ايندي بوردا- بو آلاقارانليق، هيسلي اوتاغين يوخسوللوقلا دولو هاواسيندا اؤنجه آغري وار.
سونرا اينسان دوغولاجاق.
دوغولوب اؤلهجک بلکه.
دوغولوب اؤلدورهجک بلکه.
دوغولارکن اونو دوغاني اؤلدورنلر آز اولوبمو؟
-گلير .. باشيني گؤرورم .. جااانن، قانلا دوغولور اوشاق، سوسوز، ظولومله .. جااان، جان بالا .. بير آز دا .. آااي ساغ اول .. آي ساغ اول .. دايان، هه، گوج وئرمه .. من دئينده آنجاق، ائشيديرسن؟ آنجاق من دئينده .. هه ... دايان .. ايندي وئر .. گلير .. باخ، گلير اوشاق ... - ماماچانين سسي سون آنلاريني ياشايان آغريني اوووتماغا چاليشيردي ...
قايناناسي يئنه ده اوتاغين کونجونده کي کتيله پرچيم اولموشدو، قوجاغينداکي اوغلان اوشاغينا امزيکلي شوشه دن سود ايچيريردي.
اؤنجه بالاجا باشينين تپهسي، سونرا آلني، داها سونرا اوزو گؤروندو ...
ايلاهي!
بو بالاجا اوزده نه قدر عذاب واردي!
دوغولان اونو دوغاندان داها چوخ آغريييرميش سن دئمه ...
او، باشينين هرلنديگيني، گؤزلرينين قارالديغيني، قولاقلارينين کويه دوشدويونو هيسس ائلهدي ..
باخ بو حالدا، اينسانين "اؤزوندن گئتمه سي" حاليندا، اونون روحونون بدنيله علاقهسينين قفيلدن کسيليب يئنيدن قاييتماسي مقاميندا آغري هيسس اولونمور، اونودولور، بلکه ده يوخا چيخير ...
بس کلينيکي اؤلوم مقامي؟
اينسانلار روحلارينين بدنلريندن قوپاراق اونو کناردان سئير ائتديکلريني دانيشيرلار سونرادان ...
قارانليق و اوزون تونئل، قاتار سسلريني خاطيرلادان " تاک- تاراک، تاک- تاراک" ريتمينين ايچينه دوشمک، او تونئلين سونونا دوغرو حرکت، او تونئلين سونونداکي ايشيق .. سونرا ايسه يئنه ده آغري ...
حيات- آغري دئمکدير.
اؤلوم ايسه داها بير قارانليق بطن، داها بير آنا اورگينين چيرپينتيلاري ريتمينين ايچينه دوشمک، داها بير دوغوش پروسئسي و داها بير ايشيقلي دونيايا چيخماق شانسيدير ...
يئنه آغريماق شانسي ...
يئنه آغريتماق شانسي ...
- شوکور آللاها!- ماماچا چاغانين گؤبگيني بوروب کسدي و اونو اينديجه قويوب گلديگي باشقا، تانيماديغيميز، يئريني بيلمه ديگيميز، بلکه ده هر بيريميزين واختيله اولوب ايندي هئچ بيريميزين خاطيرلاماديغي بير دونيادان آييردي، - گؤيچک بير قيزين اولدو، ماشاللاه! گؤبک جييهسي ده دومدوزدو، بوندان سونرا موطلق اوغلان اولاجاق ...
- من ائله قيز ايسته ييرديم ... - دئدي او.
- آتاسي گلسين، موشتولوق آليم، - ماماچا سئوينيردي.
- آتاسي گئج گلهجک، چاي قيراغيندان داش داشيماغا گئديب. آنجاق ياتماغا گلير، بلکه ده سحره گله، - قاينانا اوتاغين کونجوندهکي کتيلدن نهايت کي قالخيب قوجاغينداکي اوغلان اوشاغيني ياخينا گتيردي، - باجييا بااخ، ال چال باجيچون، ال چاال ...
-
اوغلان اوشاغي ماماچانين بوکوب- بلهديگي چاغايا باخدي، گؤزلري لامپانين زيف ايشيغيندا پاريلدادي و او، بالاجا، توتوق اللريني بير- بيرينه ووروب گولدو. چاغا سانکي بونا بندميش کيمي اوّل تنبل- تنبل بير گؤزونو آچدي، سونرا بالاجا آغزيني غريزي اولاراق ساغا- سولا اَيهرک يئمهگيني آختاردي، تاپماييب آغلادي.
اوغلان اوشاغينين بالاجا، توتوق اللري هاوادا قالدي، گؤزلريندهکي پاريلتيلي سئوينج حئيرته، سونرا قورخويا چئوريلدي و او، چاغايا قوشولوب آغلاماغا باشلادي ...
قادين اوستونده اوزانديغي يئمک استولونون قيراقلاريني اللرييله سيخميش، گؤزلريني مؤحکمجه قاپاميشدي. نه بو کؤرپه آغلاشمالاريني، نه ده اينديجه دئييلهجک سؤزلري ائشيتمک ايستهميردي.
ماماچا سون تاپشيريقلاريني وئريردي:
- باخ، سويوقدان قورون. بيليرم قونشولارا- فيلان ائو- ائشيک تميزلهييرسن، پال- پالتار يويورسان، آما هله بير- ايکي آي ائلمه بونو. اونسوز دا چوخ ضعيفسن. ياديندا ساخلا، دوغان آروادين قبري دوز قيرخ گون، قيرخ گئجه آچيق اولار دئييبلر ... بير شئي اولسا، منه زنگ ائلهيين، گليب باش چكهرم،- اونا ساري دؤنوب علاوه ائلهدي،- مني يولا سالين گئديم.
او، ماماچانين پالتوسونون جيبينه پول باسدي، قاپيني باغلاييب هله ده استولون اوستونده اوزانميش قادينا ياخينلاشدي:
- اصلينده ... ماماچا منليک دئييلدي، بيليرسن. آما بيز دانيشديغيميز واختدان سونرا قييمتلر باهالاشيب، هم ده سنين وضعيتيني ده نظره آلديم. اونا يوز دوللار وئرديم، بو مين دوللاري ايسه قويورام سنين باليشينين آلتينا ...
- چوخ ساغ اول،- قادين زورلا پيچيلدادي.
باخيشلاري آلاقارانليق و هيسلي اوتاغين تاوانيندا دونوب قالميشدي.
- سن ده ساغ اول،- او دا دئمک اولار کي پيچيلدادي و قالين آديالا بوکولموش چاغاني ديوانين اوستوندن قوجاغينا گؤتوردو.
- اونا باخيم .. - قادينين باخيشلاري تاواندان قوپوب قالين آديالين قيرميزي گوللرينه قوندو.
- يوخ، اونا باخماغيني ايستهميرم، توخونماغيني دا. سنينله شرطيميز واردي. .. من بو آيين آخيرينادک پايتاختا کؤچورم، بير ده هئچ واخت سني گؤرمک ايستهميرم، ياديندا ساخلا، نه واختسا بو اوشاغي آختارماغي، اونا کيم اولدوغونو دئمگي ده عاغلينا گتيرمهيهسن. .. بو، سنين دئييل، ائشيديرسن؟ سنننم ...- آز قالا يالواراراق سيزيلدادي ...
- هه ...- قادينين باخيشلاري قالين آديالين قيرميزي گوللريندن قوپا بيلميردي.
- آللاها امانت اولون،- او، قاپييا طرف گئتدي، اوتاغين کونجوندهکي کتيلدن دورماق فيکري اولمايان قادينا باخدي،- زحمت اولماسا قاپيني آچين. آرواد تنبل-تنبل قالخيب قاپيني آچدي، قالين آديالين قيرميزي گوللريني چؤله اؤتوروب قادينين يانينا قاييتدي. اوغلان اوشاغيني يئنيدن قوجاغينا آليب کونجدهکي کتيله ساري گئتدي:
- پولدان اؤزونه ساخلا، قالانيني دا وئررسن، ارين سند- سونهديني دوزلديب گئدر موسکووايا- زادا. کيشي اولوب کيشيلره قاريشاجاق باري ... اون بئش مانات دا منه وئررسن، اونون پولوندان دوکانا بورجلو قالميشام، اونو وئرمه لييم ... ياتميسان؟
- يوخ ..- قادين زورلا ائشيديلهجک سسله دئيه بيلدي.
اللري، اوستونده اوزانديغي يئمک ستولونون قيراقلاريني سيخماقدان يورولموشدو، گؤزلري يئنه ده تاوانا ديکيليايدي .. باخيشلاري ايسه قالين آديالين قيرميزي گوللرينه ايليشيب گئتميشدي ...
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.