هم رأی لیک: ايتالو كالوينو
هم رأی لیک [ dayanişma]
یازان : ایتالو کالوینو
تورکجه دن چئویرن : همت شهبازی
اونلاری ایزلَمهیه قویولدوم.
گئجه، یییهسیز کوچهده، بیر دوکانین کیرکیرهسینه بیر شئی ائتمهسینه چالیشیردیلار.
آغیر بیر کیرکیره ایدی، دمیر بیر چوبوغو قالدیراج (تالوئر، اهرم ) کیمی ایشلهییب قالدیرماغا چالیشیردیلار آمما کیرکیره قیمیلدامیردی.
اؤزوم اؤزومله، آوارا آوارا گزیشمکدهیدیم. یاردیم ائتمک اوچون من ده دَمیر چوبوغا یاپیشدیم. منه ده یئر آچدیلار.
عینی آندا چکمیردیک چوبوغو، «هایدی ایندی، هامیمیز بیرلیکده» دئدیم. ساغیمداکی دیرسهیی ایله دورتوکلهدی منی، «سوس، دَلی اولموسان، بیزی ائشیتمکلرینی ایستهییرسن؟»
باشیمی یانلیشلیقلا اولدو دئیه آشاغی سالدیم.
اوزون مدت اوغراشدیق، قان تر ایچینده قالدیق، آمما سونوندا کیرکیرهنی بیر آلتدان کئچه بیلهجهیی مقداردا قالدیردیق. موتلو موتلو بیربیریمیزه باخدیق. سونرا ایچهری گیردیک. توتماق اوچون منه بیر چووال وئردیلر. باشقالاری آینویون لارینی (melzemelerini ، وسایل) گتیریب ایچینه یوکلهمهیه باشلادیلار.
«او اییلنمیش پولیسلر گلمز آللاه قویسا»، دئییردیلر.
«دغرودور» دئدیم، «هامیسی اییلنمیش اونلارین»، «سوس، آیاق سسلری گلیر» دئییردیلر بیر نئچه دقیقه بیر. قورخوب قولاق آسدیم، «یوخ» دئدیم، «اونلار دئییل».
«همیشه هئچ گؤزلَمهدیین بیر آندا گلیرلر» دئدی بیریسی.
باشیمی آشاغی ساللادیم. «هامیسینی گبَرتمهلی» دئیه جاواب وئردیم.
سونرا، چیخیب کونجه قدَر گئتدیم، بیریسینین گلیب گلمهدیینه باخماغیمی ایستهدیلر. گئتدیم.
دیشاردا کونجده دووارین کناریندان قاپی آرالارینا گیزلَنه گیزلنه منه دوغرو گلیردیلر.
اونلارا قاتیلدیم.
دوکانلارین اوراسیندان سسلر گلیر دئدی یانیمدا کی.
اوزانیب باخدیم.
«باشینی چَک، آخماغین بیری» دئدی، «بیزی گؤروب یئنه قاچاجاقلار».
«باخیردیم» دئدیم، تئز دووارین دیبینه چؤمبَلدیم.
«اطرافلارینی چئورهلهیه بیلسک قاچا بیلمزلر» دئدی بیر باشقاسی، «سایلاری چوخ دئییل».
نفسلریمیزی توتدوق، آیاق اوجلاریمیزا باساباسا، یئیین یئیین (hizli hizli ) ایرهلیلهدیک؛ تئز تئز پارلایان گؤزلرله بیربیریمیزه باخیردیق.
«آرتیق قاچا بیلمزلر» دئدیم.
«سوندا ایسه اوستونده یاخالایاجاییق اونلاری» دئدی بیری.
«سوندا !» دئدیم.
«آللاهین بلاسی دَلَه دوز بیجلر» ( pic kurulari ) دئدی او بیریسی، «هله ائتدیکلرینه باخ!»
«دله دوز بیجلر » دئیه تکرارلادیم حیرصلی حیرصلی.
منی، آزاجیق او طرفه، دوروما (وضعیت) باخماغا گؤندردیلر. دوکانا گئری دؤندوم.
«بیزی یاخالایا بیلمییهجکلر» دئدی بیری، چووالی چیینینه آتارکن.
«چوبوق»، دئدی بیر باشقاسی. «آرخا طرفدن چیخایین. بورونلارینین دیبیندن سوزولوب گئدهریک».
هامیمیز ظفرله گولومسهدیک.
«ائششکدن دوشموشه دؤنهجکلر» دئدیم. دوکانین آرخا طرفینه سوزولدوک.
«یئنه آتلاتدیق آخماقلاری» دئدیلر. او سیرادا بیریسی «دور، کیمدی اوردا؟» دئیه سسلندی، ایشیقلار یاندی.
بیر شئیین آرخاسیندا چؤکوب گیزلندیک ، آغ آپباق آغارمیشدیق، بیربیریمیزین اللرینی توتوردوق. باشقالاری گلدیلر، آمما بیزی گؤرمهدیلر، گئری دؤندولر. بیز ده فیرلاندیق، دَلی کیمی قاچماغا باشلادیق. «باجاردیق» دئیه باغیردیق. بیر ایکی دفه بودره دیم و گئرییه دؤندوم. اؤزومو باشقالارینین دالیسینجا قووالایانلارین آراسیندا گؤردوم.
«هایدی» دئدی سسلهننلر، «یئتیشیریک».
دار کوچهلرده هامیمیز بیرلیکده آرخالارینجا قاچدیق. سن سورادان گئت، اؤنلرینی کَس» دئیه سسلندیک بیربیریمیزه؛ آرا ساکیتلهشیردی، بیز ده «هایدی غئیرت ائله قاچا بیلمییهجکلر» دئیه باغیریشیردیق.
بیر نفرینه یئتیشمهیی باجاردیم. «آفرین، قاچماغی باجاردین» دئیه سسلندی منه. «گَل، بورادان ایزیمیزی ایتیرهجهیییک» اونونلا بیرلیکده گئتدیم. بیر مدت سونرا اؤزومو، داریسقال بیر کوچهده یالنیز گؤردوم. بیریسی کونجدن گلدی، «گَل، بورادان » دئیه سسلندی. «اونلاری گؤردوم، چوخ اوزاقلاشا بیلمزلر» من ده اونون آردیندان گئتدیم.
سونرا، قان تر ایچینده دوردوم. کیمسه قالمامیشدی، باغیریش دا گلمیردی. اللریمی جئبیمه قویدوم، اؤز اؤزومه، آوارا آوارا گزیشمهیه باشلادیم.
تورکجه یه چئویرن : علی فرهاد تامور
http://dusharge.blogfa.com/post-357.aspx
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.