یاشیل احساسلی
حمیده رئیس زاده سحر خانیم -
گئنه نیسگیل لئچگین سالدی خزان
آچمامیش غنچه لری چالدی خزان
منی ده جایناغینا آلدی خزان
یاشیل احساسلی چمن ساخلا منه
...
یالانا دوزلوک اؤخو ائتسه اثر
گول بیتیب ، غنچه گولوب ، آچسا سحر
بیرده گؤرکملی اورک گؤرسن اگر
او اورکلرده وطن ساخلا منه
...
سؤزلرین سینه لره کؤز قالادار
دویغونون توشگولو کؤزدن جالادار
اونداکی سؤزگونشی چالخالادار
سؤزده اولدوز کیمی دن ساخلا منه
...
دایاغ عونوانلی داغ آواره سی یم
قارا گونلرده آغ آواره سی یم
بیر گولوشلوک دوداغ آواره سی یم
غملره قارشی گولن ساخلا منه
...
دئمیرم خوشلوغا یاد ائت یادا سال
غم اؤنونده آدیمی فریادا سال
منی ده غم بؤلوشنده یادا سال
بیر اورک پایلی محن ساخلا منه
...
بیر دایان ، ذیروه یه دیزقوی گلیرم
سانماکی خسته یم ، ایز قوی گلیرم
بیر چاناق سؤزده دنیز قوی گلیرم
بیر دؤیوش مئیدانی چن ساخلا منه
...
اوجالیقلاردا ایزین وار دئیه رک
چیخارام داغلارا یار – یار دئیه ر ک
گله رم غربت ائوین دار دئیه رک
وطن عونوانلی کفن ساخلا منه
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.