دئدیلر جهالت نهایتسیزدی
بو سؤزه بختیار، هئچ اینانمادی
آرخایین فیکره تین باجاردیغینا
جهالتی اونا حریف سانمادی
فیکرتی یوکسه لیب دوشونجه لره
دئدی جهالتی آییندیرارام
گؤزونون اؤنونده جوره جور ناخیش
اونو حقیقته باخیندیرارام
اگرسه ده ایشیق مَحو ائده اونو
اؤزومو شمع کیمی آلیشدیرارام
***
سئوگی لر گوجونو سیغنادی سؤزه
آرزونو دیله گی باغلادی سؤزه
گؤز یاشی گؤزوندن آغلادی سؤزه
عؤمورکن اورکدن دانیشیقلاری
گؤزونون ایچیندن آلیشیقلاری
ازلدن ابده چالیشیقلاری -
کارین قولاغیندا سؤزه بنزه دی !
جهالت داش اولموش اوزه بنزه دی!
چکنده گؤزه للیک ناخیشلارینی
گؤرمگه چاغیردی باخیشلارینی
جهالت کؤراولموش گؤزه بنزه دی!
ائله کی یانماغا چالیشدی اؤزو
جهالت اودونا، کؤزه بنزه دی !
قالیردی سرگردان یورغون، دؤیوشدن
جهالتین آغیر گوجونو قاندی
نئجه حیران حیران بئله بیر ایشدن
جهالت  قالایان  اودونا یاندی
یؤرولدو سوروندو دیزین به دیزین
گئدیردی جنگینه نهایتسیزین
جهالت یوگوردو چماق الینده
دئدی باش دا سیزین چماقدا سیزین!
***
اوجامان داغلارین باشی دومانلی
گلیردی بختیار باخیشی قانلی
اورکده یاراسی دئشمه دئشمه ایدی
باخیشی گؤزوندن گولله کئچمه ایدی
***
گؤزونون یاشینی سیلدی یاناقدان
کؤرپو چایدان اوزاق دوشوب ؟ هاچاقدان؟!
آرغین یؤرغون
گلیردی قاراباغدان
گؤزونون یاشیندان
سرین بولاغدان
نئجه آیریلاجاق
اوره گی داغدان؟
***
قوجامان داغلاردان
بیربیر انیردی
ساختا یول دیکله نیب
داغی دئشمیشدی
چاپاراغ  آتلاری
ماشین کئچمیشدی
نظرده اوچ مین ایل
اوچ گون گلیردی
چاراسیز
سرگردان
دوشگون
گلیردی.
30/11/87 – عباس بابایی ( سؤیلر)