شعیر حیات دیرمی؟ يا حيات شعیرمی؟ اینسان ازل گوندن بو کلمه نی نه قدر اؤیلسه ده او قدر بو کلمه نين نئجه اولدوغون دان اوزاقلاشیر آنجاق بير سؤزله دئسک شعیر شعیر دیر و هر میللتین ایلک دویغوسو یالنیز شعیر قالبینده ایفاده اولونوب. آذربایجان ادبیّاتیندا شعیرلرین بیر چوخ بؤلومو وطن عنوانیله یارانیبدیر و بو اؤزوده بیزیم اجتماعی شرایطدن آسیلی اولا بیلر بو ایکی هیجالی  سیجاق وطن کلمه سی ان اسکی زامانلاردان بری بیزیم ادبیاتدا اؤزللیکله شعیر بؤلومونده اوستون سویّه ده یئر توتوبدور.

سن آیاق بارماقلاریمدان

اوره ییمه سیچرایان

شیرین و شور پیتراق گول آچان

سیجاق بیر هیجا

و یا

یانمیش قوملارینا

اوداق باسماق دی شعیریم

قیساجا

تاپینماقدیر

آزادلیق هئیکلینه. (هادی قاراچای)

و مقدّس ساییلدیغینا گؤره شاعيرلر طرفیندن "آنا" آدلانیبدیر و البت چوخ شاعیرلریمیز وطن عشقیله شعیر میدانیندا جولان ائدیب و "وطن شاعيری" عنوانینی قازانیبلار و وطنه اولان سئوگی و دویغولارینی اوجسوز بوجاقسیز دونیانین کار قولاغینا یئتیریبلر. آنجاق بو سیجاق هیجالی وطن کلمه سی هادی قاراچای شعیرینده اؤزه للیکله باداملیقلار مجموعه سینده اسکی اوخشاتما قالیب لریندن چیخیب و شاعيرین سئوگیلی دوستونا دؤنه رک شاعیر سانکی اؤز سئوگیسي ایله دانیشیر و اوره ک دویغولارینی عینی زاماندا یئنی یئنی اوبرازلارلا سئوگی سیله بؤلوشور.

 

آآخ

سئوگیلی دوستوم

منه وئردیک لرین

نه قدر

دادلی

نه قدر بؤیوک

و یا

 

سویوموش می دیر سئوگیلی دوستوم

ساچیمدا دن

ساققالیمدا دن

گؤرورسن

یوخوسوزلوق دا چکیرم هردن.

هومانیستی "اینسان سئوه ر لیگی" تام معنادا بیر فلسفی و یاخود اخلاقی قورولوش بیلسک چوخ ساده لیکله دئیه بیله ریک هادی قاراچای بیر هومانیست شاعیر دیر نيیه کی هومانیست مکتبی نین ایلک و سون سؤزو آزادلیقدیر و هادی قاراچای شعیرلرینده اینسان لارین آلین یازیسینا ماراق گؤستره رکن اونلارا خوشبخت لیک و سعادت دیله ییر.

بؤیوک سعادت دیر

منه سورارسانسا

تورپاق –یاغیشلا

اینسان-آزادلیقلا

قووشدوغو یئرده.

شاعر وطنین مین ایللیک تاریخین گؤز اؤنوندن کئچیره رکن بیر –بیر باشینا گلن لری  شعیر فورموندا و قیساجا شکیلده خاطیرلاییر. بو عصیرده کی اینسان لار دموکراتیک شعارلارینی یالنیز بوغازلاریندا لووغالاییر و بیر نئچه تاپشیریلمیش مقاله گونده لیکده درج ائده رک بورجومو اؤده دیم دئیه رک اؤزوندن راضی قالیر.

اونودولور داغلاری نین سوی آدی

و قارانلیق اؤرتور

       دو نه نیندن

                بو گونونه گلن ایزلری

آخ منیم

فرحلی ایلکینیم

         کدرلی سونوم

                           سوورولدون آت دیرناغیندا.....

و باشقا بیر شعرینده خالقین وطن بایراغی کؤلگه سینده دینجلمه یه چاغیرارکن یئنی دئییمله ایمگه لر و اوبرازلار اینسان قارشیسیندا جانلانیر

 بیر قاریش تاپسایدیم

  بایراغی نین

              کؤلگه سیندن

       چکردیم ائلیمین یورقونلوغونا

       دینجه لین دئیه ردیم

گون اورتا چاغیندا

        یانیق کرمین هاواسیندا

شاعیر یالنیز اینسانلارلا یوخ بلکه طبیعتین اوچلوک اولان وارلیغی ایله (یئل. چای. تورپاق)

صمیمی لشه رک اؤزونه بیر یاخین یولداش بیلیر و اونلارلا دردینی بؤلوشور

قادامی یئللره وئریرم

        آپاریر

     آغریمی چایلارا وئریرم

            گؤتورور

دردیمی تورپاغا وئریرم

          چکیر.    

        

   شاعیر هادی قارا چای اییرمی ایله یاخین غریب اؤلکه لر ده یاشاسادا اؤز وطنیدن بیر آندا اؤزونو اوزاق حیس ائتمه ییب و هئچ واخت غربت ائلین نه قدر گؤزه ل اولسادا اؤز وطنیندن اوستون توتماییب و غربت ائلین بدیعی اوبرازلارلا اوخوجو اؤنونده جانلاندیریر.

 شهرین بو باشیندا منم

  آلچاق تاوانلارین کیچیک پنجره سینده

شهرین او باشیندا

      کوچه لری پول قوخویان

    دیللرینی بیلمه دیک لریم

 

 و باشقا بیر شعرینده:

 

غربت سویو  

  یویانمادی اللریمین قابارین

و یوزده بیری

 یوزولمادی سئودا یوخولاریمین.

بونونلا بئله شاعیر نه قدر آجیناجاقلی نه قدر فاجيعه یوکلو آنلاری اولسادا یالنیز دؤزوم  و سئوگی ایله یوزا بیلیر:

نه قدر یورولماز

 نه قدر ایت جانلی اولور

  ایلقارلی اوره ک

اؤز وطنی نین گؤروشونه الی بوش آمما اوره یی دولو گلمه یینی آرزولاییر:

ایشته

غربت ایللرینین توزو باشیمدا

الی بوش اوره یی دولو

  گؤروشونه گله جیم.

سارسیلماز اراده ایله وطن اوغوللاری دوستاق گوشه لرینده قهرمانجاسینا اؤلسه لرده هئچ واخت اؤلومو اؤزلرینه هده بیلمه ییبلر بلکه ده اؤلوم ایله تاریخ بویو شرف گونشین ایشیقلاندیریب لار:

آخ منیم قهرمان سئوگیلیم

  اؤلوم

    بیزی اؤلدور مک اوچون نه سارساق حربه ایمیش

  یاشا ای اوجا زیروه.

بیرسؤزله دئسک وطن له غربتی یئنی بیر فیکیر و ایناملا ایضاح ائدیر:

غربت سوسوز لوق دور

روحون اؤگئیلشمه سی

ایشته

  وطندیر دوستوم

 اؤپوش و دؤیوش کیمی بیر شئی.

 

                                                   قيش 1387

http://dusharge.blogfa.com/post-302.aspx