قهرمان يازيچي لار چاغي/ ياشار کمال/ چئويرن: قدير اسماعيل
"يوخسوللوغو، حاقسيزليغي سؤيله مک، سؤيله يه بيلمک آرتيق قهرمانليق اولماقدان چيخمالي و بونلار يازيچيلارين بيرينجي وظيفه سي اولماليدير. بير يازيچي نين برابرليگي مدافعه ائتمه سي، ازنلره، ايستيثمارچي لارا قارشي چيخماسي دؤوروموزده عادي بير حالدير. بونو وظيفه اولاراق قبول ائتميه ني کيمسه اينسانليق و وطنداشليق بورجونو يئرينه يئتيرن يازيچي سايمير. بيزده ده بئله اولمالي دئييلمي؟ آمما هاني؟!"
بيز نه دئييريک؟ برابرليک اولسون، اينسان اينساني قول ائتمه سين، اينسان آزاد اولسون - دئييريک. دؤوروموزده ياشايان بير يازار اوچون بوندان طبيعي بير ايستک، بوندان ياخشي نيت، بوندان گؤزل آرزو اولارمي؟! دونيانين بوتون ويجدانلي يازيچيلاري بونو ايسته يير. هئچ کيم ده اونلارا "نه ائديرسينيز؟" ، "گؤزونوز اوستونده قاشينيز وار" دئمير. بو دئديکلريمي ويجدانلي يازارلار يوز، يوز اللي ايلدن بري طلب ائديرلر. يازيچيلار خالقلارين دانيشان ديلي دير. و اونلار چوخ زامان اوزرلرينه گؤتوردوکلري بو مسئوليتين عؤهده سيندن بؤيوک سعي لرله گلميشلر، گليرلر.
بيزيم يوردوموزون گئرچک لييي باشقا ميللت لره باخاندا بلالي بير گئرچک ليک دير. بيزيم يازيچيلاريميز دا بو مسئوليتين آلتيندان آز دا اولسا، اللريندن گلن قدر چيخماغا چاليشيرلار.
اينسانلاريميز تورپاق کؤله سي. بير چوخ اينسانلاريميز ماغارادان بئتر ائولرده ياشايير. گئدين شرقي آنادولويا، مينلرله کند گؤره جکسينيز، ائولري يئر آلتيندا. بونلارين يئر اوستونه چيخماسيني ايسته ييريک. ايسته ييميز او قدر کيچيک بير ايستکدير کي! بونلاري يئر اوستونه چيخارتماق چتينديرمي؟! اينسانلاريميز آراسيندا داش قوووقلاردا ياشايانلار دا وار. بيزلر يازيچي کيمي بوندان اوتانيريق.
اينسانلاريميز بو وضعيتدن نئجه قورتاريلا بيلر؟ بير چوخلاريميز بونون علمي يوللاريني دا سؤيله يير.
مکتبلريميز يوخ. سکسن فايزيميز اوخويوب-يازا بيلمير. دئييريک کي، تجروبه دن کئچيريلدي، کؤي اينستيتوتلاريني آچمادان خالقيميزي اوخودا بيلمريک.
مئشه لريميز يوخ اولور. علم آداملاريندان سيتاتلار گتيريريک. بونون چاره سيني گؤستريريک. کيمسه مباحثه ائتمک لزومو بئله دويمور. سانکي داشا سؤيله ييريک.
آغالار ايش گؤرن بير مأمورو منافعلري نامينه چاليشديريرلار. بيز بونو بوتون چيلپاقليغي ايله اورتايا تؤکوروک. قيامت قوپور. سوس، اولماز!
گئريليک لرله، حکومت لرين يانليش ايشلريله آمانسيزجاسينا دؤيوشوروک. چوخوموز حبس اولونوروق.
بيزيم بو گؤزل يوردوموزو بير ياساقلار يوردو حالينا گتيرميشلر. ائله گولونج و قورخونج ياساقلارلا قارشي-قارشييا قاليريق کي، بيلميريک نئيله يک. "آماندير"، "ائتمه يين- ائله مه يين"- بو يورد بو قاداغالاردان بو گونه دوشدو. بير-بير اثباتلاييريق. سؤيله دييميزه گولن بئله تاپيلمير. بوشلوقلارا سؤيله ييريک درديميزي.
بوتون دونيا بيزيم گئريده قالميش بير توپلوم اولدوغوموزو بار-بار باغيرير. اللرينده آچيق-آشکار، دوغرو-دوروست ستاتيستيکا وار. نه يئيير، نه ايچيريک، هاردا ياتيب قالخيريق، هامي، هامي هر شئيي بيلير.
بيز ده بونو اينکار ائتميريک. ايشيميزه ياراياندا، فورصت دوشنده: "بيز گئري قالميش جمعيتيک" - دئيه باغيريريق. رسمي شخصلر، علم آداملاريميز، هاميميز سؤيله ييريک.
هاميسي گؤزل، چوخ ياخشي... آمما بونو رومان اولاراق يازدينمي -قيامت، پيئس ائتدينمي - قيامتين قيامتي! کينويا ايسه هئچ ياخينلاشا بيلمزسن. بير سئنزوراميز وار کي، نفس آلديرمير. قورخونج خيال کيمي قارشيندا.
باخ، بيزيم يازيچيلار بوتون بونلارا قارشي چيخيرلار. قارشي چيخينجا نه اولور؟ ارتجاع و حکومتله اوزلشيرلر. بونا گؤره باشلارينا اينانيلماز ايشلر گلير.
بو زامان خالق نه ائدير؟ حاقلي اولاراق، بئله يازيچيلاري قهرمانلاشديرير. يازيچيليق اؤلچوسو بير يانا قويولور، اورتادا بير ايگيدليک اؤلچوسو قالير.
" واي ددم، واي، فيلانکس بير رومان يازميش کي، هر صحيفه سينده يوخسوللوق! يازيچي دئييل، قهرماندير! شير اورکلي بير آدامدير! "
" واي ددم، واي، فيلانکس بير پيئس يازميش کي، بو پيئسه گؤره حبس اولونماسا، اليمي کؤکوندن کسرم. بو يازيچي آغالاري اولمايان کيمي اله سالميش. دئيه سن، هئچ قورخمور. يا دا جانيندان بئزيب " .
" بير اوچئرک {مقاله، رساله، شرح، رپورتاژ} يازميش کي... اوچئرک دئييرم سنه! مالاريادان اؤلن لري، پلانتاسييا {تارلا ؟} صاحیب لري نين حيله لريني ائله تصوير ائدير کي، بو يازيچي نين باشينا مطلق بير ايش گله جک".
"بير فيلم چکيب لر کي، اگر سئنزورا دا بو فيلمي بوراخارسا... نه ائتميشلر؟ فيلمده آياق يالين کندلي گؤسترميشلر. احسن بو آداملارا! بؤيوک قهرمانليق! آياق يالين کندلي ها!.. "
حقيقتن ده، يازيچيلاريميز يوخاريداکي کيمي اؤيگولرله قارشيلاشيرلار. يازيچيلاريميز سؤيله ديکلريندن، يازديقلاريندان اؤترو پيسلنمسه لر، باشلارينا مين بير اويون آچيلماسا، مملکت گئرچکلريني ايسته ديکلري کيمي يازا بيلسه لر... - بونلاري يازماق عادي بير ايش اولسا، کيمسه يازيچييا قهرمان گؤزويله باخماز. يازيچيلار ايشلريني گؤرر، دئيرلر، کئچيب گئدر. دونيانين باشقا اؤلکه لرينده يازيچيلارين وظيفه اولاراق گؤردويو ايشي بيزيم يازيچيلار پيسلنمک، حبسلر، آجليق باهاسينا گؤرورلر. بونا گؤره ده يالنيز ايگيدليکلري يؤنونده توتولور، سئويليرلر.
قوي اؤيولسونلر، قهرمان ساييلسين لار، بونلارا اعتيراضيم يوخ. اوسته ليک: "آزدير" - دئيرم. " خالق بير شئي وئره بيلمه دييي يازيچيسينا هئچ اولماسا کؤنلونو وئرير" – سؤيلرم.
حال بو کي بونون خاريجينده ياخشي، گوجلو، گئرچکدن بير هاواسي اولان، بيزه گؤزل دونيالار وئرن يازيچيلاريميز وار. اونلار بؤيوک بير سعي له اينسانلاريميزين، مملکتيميزين رئالليقلاري ايله مشغولدورلار.
يوخسوللوغو، حاقسيزليغي سؤيله مک، سؤيله يه بيلمک آرتيق قهرمانليق اولماقدان چيخمالي و بونلار يازيچي لارين بيرينجي وظيفه سي اولماليدير. بير يازيچي نين برابرلييي مدافيعه ائتمه سي، ازنلره، ايستيثمارچيلارا قارشي چيخماسي دؤوروموزده عادي بير حالدير. بونو وظيفه اولاراق قبول ائتميه ني کيمسه اينسانليق و وطنداشليق بورجونو يئرينه يئتيرن يازيچي سايمير. بيزده ده بئله اولمالي دئييلمي؟ آما هاني؟!
بونلار عادي ايش ساييلديغي گون - يازيچيلاريميز يورد گئرچکلريندن سؤز آچديقلاري زامان نه قدر آجي دانيشسالار دا باشلارينا بلا گلمه دييي ، يعني قهرمان يازيچيلار چاغي نين اؤتوب کئچدييي گون ايسته دييميز دئموکراتييايا ياخينلاشميش اولاجاغيق.
دئيه جکسينيز کي، قهرمان يازيچيلار چاغي هئچ بير زامان، هئچ بير مملکتده کئچميه جک. منيم دئمه ييم اودور کي، دؤوروموزده عادي بير شئي ساييلان، بير يازيچييا چؤرک کيمي، سو کيمي گرک اولان برابرليکدن، يوردونون گئرچکلريندن سؤز آچماسي قهرمانليق ايسته ين بير ايش اولماسين. باشقا مملکت لرده بئله دئييل.
بونون اوچون غئيرت ائتمه لييک. بونون اوچون چاليشمالييق.
Yazınin latincəsini burdan oxuyun :
http://irfan.azeriblog.com/2008/03/16/yashar-kamal-qehreman-yazichilar-chaghi
خاضیرلایان : همت شهبازی
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.