آمان سیز
خومپاره دن ، آمان سیز
نئیله میشم آخی ، نئیله میشم ؟
سؤلوک کیمی بوغازیمدان دوتوبسان !
نئیله میشم ، ایزله ییرسن کؤلگه می؟
چئویریبسن گؤنلریمی ، زهه ره ، آخی!
دوتما قارشین گؤنشیمین ، بیرسئفه بولود کیمی.
آچیل باشیمدان ، آچیل !
آرزیلیرام منده ، اوزوم سالخیمین
آرزیلیرام منده ، اوجاق توستوسون
اللی قاتلی ، بولودلاردا ، یاتاقی
کؤینه گیمین چیچکلرین ، یام یاشیل
الده چانتا ، زامان قولدا فیرلاسین .
آچیل باشیمدان ، آمان سیز !
دا قوی منده ، قیریشیغیم آچیلسین
مدرسه ده لاپ قارشی دا پارلاییم
اوتانماییم اؤیرتمنده ن ، بؤی یاشدان
چئکینمه ییم مجلیسلرده ن ، یولداشدان .
عاقلیما دا ، ایندی گولومسه نیللر!
دئییللر کی اؤتور گئتسین ، دلی دی
دیندیرمه یین اونو ، آدام دئییل کی !...
آچیل باشیمدان ، آمان سیز آچیل
عزراییل دا ، سنی گؤرسه تیتره یه ر .
آغیزلاردا ، ساققیز یئرینه چئینه نیرم ، آخی!
گؤزله ره ، بارماقلارلا سانجیلیرام ، آنلاماز
آنلامیرسان ، آنلامیرسان ، نئیله ییم ؟
دورت یوللاردا ، یاخالانان یولچولار کیمی ، الینده قالمیشام
داها بوراخ منی ، بوراخ منی ، آمان سیز
بوراخ منی ، مقصدیمه یئتیشیم .
شهریمیزین جانلی فاجیعه سی اولوب ، بولو توزلاردا گئزیرم ،
گولمه جه لر یئرینه ، اس ام اسلرده ،آخی !
کؤچه میزده سالاملاییرام دا ، قاللاقلانیرام ، آخی
دا قوی منده یاشیللیغی آنلاییم
آچیل باشیمدان ، آچیل .
بوراخ منیم حایاتیمی ، یازیمی
زهر ائتمه وارلیغیمی ، آزیمی
سارالتما دای ، بو گله جک یازیمی
بوراخ منی ، آمان سیز !
آچیل باشیمدان ، آچیل
ایسته مه کی دورد یوللاردا قورویوم ،
تندیس کیمی میدانلاردا قاباریم .
دؤنگه لرده باخار گؤرمه زه و هر اؤیوناجاقا بنزه ییم .
آخی منده بیر اینسانام !
آرزیم واردی !
سؤزوم واردی !
آغاجلاردا
آلمالاردا
قاتلی قاتلی بینالاردا
دمیرلرده
ماوی گؤیده
دنیزلرده
یاشیللیغدا
بنیزلرده ، گؤزوم واردی !
آخی منده بیر اینسانام .
چوخ گؤزلرده سئوگی گئزدیم ، سن قویمادین
پارلاق – پارلاق گؤنش گئزدیم ، سن قویمادین
بیر اوره ک کی ،منی گئزسین ، سن قویمادین
بو عصیرین آدامیام ، آخی منده !
دادمالیسین ، داد مادیم هئچ !
چاتمالیا ، چاتمادیم هئچ !
استیرمه دای شه ره یئلین ، بو پوزولمش گؤنلریمه
قوی شئه دوشسون بو قوروموش چؤللریمه
یاغسین یاغیش
جؤشسون بولاغ
چیچکله نسین ، قورو چؤلوم
منده گولوم ، منده گولوم...
آچیل باشیمدان ، دا آچیل
آخی منده سئویرم ، آنا گونون
سئویرم .
سئویرم آتا گونون
و قونشوموزون پنجره سین .
آه نه گؤزلجه سینه بیر یئنی لیک ، سئویرم
نه گؤزلجه سینه ، بیر قاریج یاغ ، سئویرم سیرفامیزدا .
آچیل باشیمدان ، دا آچیل !
دا یورولدوم ، بوشلا منی گؤزو چیخمیش !
یوخسوللوق
یوخسوللوق
یوخسوللوق .
امیر نصیری ( زنگانلی ائلمان )
30/4/1387
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.