گوزل آنا
zanganli_elman
گؤزل آنا
شوه تک ساچینا زامان دن سالیب
یام یاشیل گونلری کیم سندن آلیب؟!
اوزومده دوداغین ایستی سی قالیب
ایندیسه یارپاق تک اسیرسن آنا
دونیالار بیر یانا ، سنده بیر یانا
آیریلیب گئدیرم اوزاق یوللارا
گاه ساغا چؤنورم ، گاهدا سوللارا
آیاقیم ایلیشیر داشلا کوللارا
یوخودا دیسکینیب دئییرسن جانا
دونیالار بیر یانا ، سنده بیر یانا
اتگینده گولوم ، گولشنیم قالیب
بیلمیرم یئنه وار؟ یوخسا سارالیب
گونشیم هارداسان ؟ گونوم قارالیب
داریخیب قولاقیم یئنه بیر جانا
دونیالار بیر یانا ، سنده بیر یانا
یاواش سور دئیردین چرخینی آمان
هادیر اول ییخارسان یاماندیر یامان
نه یامان قوجالدیب گؤزلیم زامان
دوندریب بو خزان کؤنلومو قانا
دونیالار بیر یانا ، سنده بیر یانا
سئوینجله آلاردین دیزلرین اوسته
لای لایلا اوخشاردین یاتام اوز اوسته
گئجه لر یورغونلوق قالدی گؤز اوسته
قوربانام موقددس سن تک عونوانا
دونیالار بیر یانا ، سنده بیر یانا
داغلارین مارالی یاشیل چیچگی
دردلرین درمانی ، آنا لچگی
بالانین شیپ شیرین سن سن گؤیچگی
الیمدن دوتاراق گلیرم جانا
دونیالار بیر یانا سنده ، بیر یانا
شربتین دادی یوخ آغزیمدا سن سیز
یاراشماز داغلارا یاشاسین چن سیز
گؤرمه دیم گؤزونو یوماسان منسیز
ساچینا دن دوشوب یئتیشمیر سانا
دونیالار بیر یانا ، سنده بیر یانا
هر زامان سیخیلیب اورییمد ه سن
نیسگیللی آرزیمد ا ، اورییمده سن
گؤزلورم گؤزومون یاشین سیله سن
سودونو حالال ائت آنا ، (( ائلمانا ))
دونیالار بیر یانا ، سنده بیر یانا
امیر نصیری ( زنگانلی ائلمان )
8/3/1387
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.