گوزل آشیق
(( گؤزل آشیق ))
روحوما یاییلیر شیرین لای لایین
بولودلا ر دا آلیر سندن اوز پایین
دنیزسن دالغالان یاتما آرخایین
سازینی دیللندیر آی گؤزل آشیق
یام یاشیل چیچک سن باغا یاراشیق
شامانین قامانین یادیگاریسان
علسگر بابامین عطری ، باریسان
ائلیمین دیلی سن ، قیزیل کانی سان
بیر پارلاق اولدوز سان آی گؤزل آشیق
یام یاشیل چیچک سن باغا یاراشیق
ساوالان زیروه سی چنی ده ، سن سن
ائلیمین شنلیگی غمی ده سن سن
سسی نین زیلیده بمی ده سن سن
اولوبسان گؤیلرده آی ، گؤزل آشیق
یام یاشیل چیچک سن باغا یاراشیق
یئدی مین ایللرین هاواسی سنده
سؤزلرین سئچیلمیش باهاسی سنده
اوره یین داغلاردا ، دوماندا ، چنده
ساری تئل هاواسین دیللندیر آشیق
یام یاشیل چیچک سن باغا یاراشیق
کرمدن سئوگینی یئتیردین بیزه
نیسگیللی اوره یی گئتیردین سؤزه
ائله بیل ایشیق سان گلیرسن گؤزه
گؤزلرین قوربانی اولارام آشیق
یام یاشیل چیچک سن باغا یاراشیق
آیریلیق اوزوگو ، قاشی سنده دی
قاراباغ توپراقی ، داشی سنده دی
آنالار گؤزونون یاشی سنده دی
یارالی کؤنولون درمانی آشیق
یام یاشیل چیچک سن باغا یاراشیق
زنگانین ایگیرمی دوققوز هاواسی
ائل باغی ، ائل داغی ، چیلله خاناسی
گؤزونون آغیسان همده قاراسی
زنگانی اونودما آی گؤزل آشیق
یام یاشیل چیچک سن باغا یاراشیق
یئنه ده بیزی بیر آپار داغلارا
خان آراز چینینده اؤتن چاغلارا
مئشه لی چؤللره نارلی باغلارا
سئودا سان سئوگی سن آی گؤزل آشیق
یام یاشیل چیچک سن باغا یاراشیق
چالگینان قاراباغ شیکسته سیندن
آیریلیق دردیندن حیکایه سیندن
ناتوان باغیندان ، بنؤشه سیندن
اوزگورلوک شارکی سین چال گؤزل آشیق
یام یاشیل چیچک سن باغا یاراشیق
سسله قوی بولبوللر قاییدسین باغا
بولودلار گؤز یاشین سیخسین توپراقا
جان وئرسین سارالمیش گوله یارپاقا
آنا تک لای لایین چال گؤزل آشیق
یام یاشیل چیچک سن باغا یاراشیق
اورکلر داریخیب آرانا ، کنده
داریخمیش اوره یین درمانی سنده
قالمیشیق بوراندا ، دوماندا ، چنده
سارالمیش چؤللره یاغیشسان آشیق
یام یاشیل چیچک سن باغا یاراشیق
داغلارین چیچگی سنله اویناییر
بولاغلار سسینله جوشوب قایناییر
آنالار سسینه سسین اوخشاییر
آناسان ، آرخاسان ، آی گؤزل آشیق
یام یاشیل چیچک سن باغا یاراشیق
اینجیدیبدیر سنی وفاسیز زامان
نیسگیله باتیبدیر اوره یین یامان
یولونا داوام وئر آماندیر آمان
موقددس دیر یولون آی گؤزل آشیق
یام یاشیل چیچک سن باغا یاراشیق
وصفینه یئتیشمیر غزل چار پارا
سئوگیدی اوره یین ، پام پارچا یارا
گؤزلرین هر زامان قارادیر قارا
وطنین وورغونو آی گؤزل آشیق
یام یاشیل چیچک سن باغا یاراشیق
دیللندیر سازینی داریخیب ائلمان
گؤ رجکدیر داغلار چیسگینلی دومان
اوزونده ایتیریب ، سؤزونده زامان
زامانین یورغونو آی گؤزل آشیق
یام یاشیل چیچک سن باغا یاراشیق
امیر نصیری ( زنگانلی ائلمان )
1386
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.