زنگین (زنگانلی لارین ادبی درنه گی)zangin

( حیزبیلیک )

آتلیلارین  باشچی سی بوسؤزو دئیه رک بیزدن اوزاقلاشیردیلار؛بیز یولداشلار طرفیندن گلمیشدیک ویئنه ده گله جه ییک. بو سؤزو بوتون کندین و قور قونشو کندلرین آداملارینا یئتیرین کی حیزبین آداملاری سیزه خوش گون وئرمییه جکلرنمه ده  واریوخونوز واردی هامیسینی الینیزدن  آلاجاقلار . من یولداشیم مشه رحیمله گؤجویله سؤرونه سؤرونه بیری بیریمیزه چاتاراق یامان گؤنویله ال قولوموزو آچماسینا چالیشیردیق . آنجاق قاش قارالیردی چؤلچو لرین ائوه گلمک چاغیدی ، بیردن یولداشیم مشه رحیم دئدی : اشی ائشیدیرسن؟ ائله بیل بیر سس گلیر . دئدیم آی مشه رحیم ائله بیل آتلیلارین کؤتگیله بیزه تاپلامالاری سنه تاثیرین بوراخیب دیر قولاقلارین سسه دوشوب . آی مشه بایرام نه تاثیری؟ اشی نه دانیشیرسان ! مشه رحیم ائله سن دئیه ندیر بیرسس گلیر من ده ائشیدیرم ، بیرزینقیرو سسینه اوخشاییر،قوی یاخینلاشسین گؤرک کیمدیر نه سسی دیر.

یا آغام ایمام ریضا بس مشه بایرام مشه رحیم بونه ایشدیر ، نئدن بس بو گؤنه دوشوبسینیز ! ؟ هانسی ظالیم سیزی بوگؤنه سالیبدیر ؟ .آی مشد شیرنعلی هئله ال قولوموزو آچگیلان سؤز چوخدور یولدا  دانیشاریق .ال  قولوموز آچیلاندان سونرا بیز اولایی مشد  شیرنعلیه  دانیشدیق ، مشدشیرنعلی ده باشا دوشه ندن سونرا دانیشیقا قیزیشدی : آخی بلکی بوساحات من چرچیلیکدن گلمه ییدیم اوندا سیزین ایشینیز بللی دئییل دی کی ؛ الله سیزی بوگؤنه سالانلارین ائوین ییخسین بس ایندیسه نئیله مه لیییک ؟ ایندیسه گرک اوزوموزو بیر حکیم یوخسادا سینق چیا گؤسته رک بوتون بئل بوخونوموزو آغری دوتوب سونرا دا کئت خودانی گؤرمه لیییک . آخی سیز گؤر نه قدر ناشی لیق ائیله ییب سینیز؟ سیز هئچ دئمیرسینیز کی بیز بیر بئله وار یوخوموزو شهرده کی ائویمیزین پولون درده دئین زادلاریمیزی نئچه قاتیرا یؤک ائیله ییب بو ییئیه سیز چؤلده هارا گئدیریک ، کئت خودا بیز حیزبین تسللوطون وگؤزل ایشلرین واوزگورلوک یارادماسین گؤروب

داهاشهرده گؤنوموزو کئچیرتمه یی دوز بیلمه دیک اونا گؤره ده تصمیم دوتوق وار یوخوموزو پولا چئویریب تئزلیکجه کندیمیزه قاییدیب بیزده حیزبین یاردیمچیلیقیلا بیر تیکه یئره صاحاب اولوب و اوز آتا بابا ایشیمیزدن یاپیشاق ؛ بیز شهرده یالاندان فهله لیگیله آرواد اوشاق دولاندیران دئییلدیک ائله اونا گؤره ده بو ایشی گؤردوک بیزی باغیشلارسینیز . ایندیسه ده دئییرسینیز کی سیزی حیزبین ( یولداشلارین ) آتلیلاری سویدولار اشی هئچ بیلیرسینیز کی نمنه دانیشیرسینیز ؟ بوسؤز ایه م بؤیوک یولداشین ( حیزبین ان باشچی سینین ) قولاقینا یئتیشسه سیزی باغیشلاماز، حیزبین مرامی ائله آدیندان بللی دیر قارداشلیق یولداشلیق بیرلیک... نه کی اوز میللتین سویماق ، سیز هاردان باشادوشدوز کی سیزی سویان آتلی لار حیزبین آداملاریدیر ؟. آخی اونلار بیری بیرین یولداش یولداش سسله ییردیلر . یاخشی اونلارین باشچیلاری نه جور آدامیدیر نه قیلیقیدیر؟

کئت خودا بیر اوزون بیقلی ،  قارا اوجا بوی کیشیدیر. مشه رحیم سن سؤیله گؤره ک نه جور آدامیدیر؟ کئت خودا ائله مشه بایرام دئدیکلری هامیسی اوندا واریدیر آمما لاپ چوخ بیر زاد اوندا گؤزه چیرپیردی اونون سول قولاغینین اوجو ائله بیل ایچه ری قاتلانمیشدیر یوخسادا یوخویدور .

یاخشی مشه رحیم چوخلودا اؤسگوروردو یوخ ؟ دانیشانداداچیغیریب یولداشلارینا یامان دئییردی یوخ ؟ ائله اوجورودو کئت خودا سیز هاردان بیلدیز ؟ آی مشه بایرام مشه رحیم ناراحاند اولمایین واریوخونوزو اونلاردان آلارام واونلارین آمانلارین کسه رم ؛ داها سیز دورون گئدین ایشینیزین دالی سورا قالان ایشی من بیلیرم نئیله یه جم یاخشی کئت خودا ائله بیل کی سیز اونلاری تاناییبسینیز اونلار کیمدیر ؟ داهاسیزین هله لیک هئچ زاددا ایشینیز اولماسین، من گرک صاباح بو اولایی حیزبین باشچی سینا یئتیرم. سحر چاغی کئت خودا بیزیده اوزویله شهره آپاریب بؤیوک یولداشین تیکینتی سینه چاتدیق . بیر بؤیوک وگؤزل تیکینتیدی قاپیسیندا دوران عسگرلر کئت خودانی تاناییب سالام سؤیله ییب بیزی تیکینتی تین حایاتینا آپاردیلار .کئت خودا عسگرلرین بیریسندن سوروشدو اوغول آغانین تشریفی وار؟ عسگر دئدی واردیلار کئت خودا خئییر اولا

خئییردی اوغول . بس کئت خودا سیز ائیله شیب بوردا بیر چوبوغ آلیشدیرانا من ایچه ریده ن سیزه خبر گئتیررم. کئت خودا چوبوغونا بیر ده ده لی نه نه لی پوک ویریب دئدی مشد بایرام

مشد رحیم آغانین قوللوغوندا هرنه مه نی دوز و و یئرلی یئریلن آغایا دانیشارسینیز هر نمنه ده سیزدن سوروشدو اونا جاواب وئرسینیز . گؤزلریمیزین اوسته کئت خودا ، کئت خودا چوبوغونا بیرپوک ویریب دئدی باخین بو ایشده گره  چوخ دیققت اولونا سیز منه دئدیکلریزله منده اوز حسابیمی گؤرموشم آمما اگر سیز دئیه نله من فیکیر ائله دیییم اولماسا مومکوندور بو ایش نئچه نفرین آبیریلا پیرتلاشا دوز فیکیرلرینیزی ائیله ییب هوش هاواسینیزی ییغین بیر یئره . گؤزلر اوسته کئت خودا . بیزه ایجازه وئریلدی آغانین قوللوغونا گئدیب و آغانین ایشاره سیله یئره اوتدوق .آغا کئت خودایا باخاراق بویوردو کئت خودا داها لاپ قوجالیبسان، باش گؤزونه چن دوشوب ؛ بیزده ائله سیزین کیمی دوزگون کیشیلره اومود باغلایاراق بو یول وموباریزه نی باشلاییب شاهین قارشیندا دایانیب اوز یوردوموزون ، آناوطنیمیزین و خالقیمیزین اوزگورلوگونه چالیشدیق وسونوندا دا بو  بؤیوک ایشه وموقددس دیله گه چاتدیق وائله یئنه ده خالقیمیزین اومودویله یولوموزا داوام وئریب ظالیملرین اوغروندا دایانمیشیق . بیز بوسؤزلری ائشیده ره ک هئچزاد باش تاپا بیلمه ییردیک تکجه فیکیریمیز الیمیزده ن گئده ن وار یوخوموزیلا آغا بیزه نه دئیه جه گیدی . آغا دانیشاراق امر ائیله دی ایکی قلیان اوزلرینه وایکی چایدا دا بیزه گئتیردیلر .من قورخوردوم داها چوخ اوتورساق اوزوموزو ایتیره ک دئمگ اولار کی بیزی اسمه دوتموشدور آرزیلاییردیق بیر یئر آچیلا بیز گیزلینجه چایلاری  یوخ ائدک، بیردن کئت خودا بیز باخیب بیلیندیردی کی چایلارینیزی ایچین، آنجاق بیز هئچ بیلمه دیک چایلاری نئجور ایچدیک .آغا سؤزون دئییشیب بویوردو کی یاخشی کئت خودا ایندیسه سؤیله گؤروم نئیه گؤره گلیبسن ؟ باشقا بیر یئنی خبر واردیر یوخسادا توممه تین خانین توطیئه سی سیزی ده دوتوب ؟ کئت خودا بیر یامان تعجوبیلا سوروشدو نئجه کی خانین توطیئه سی ، نه توطیئه سی ؟! آغا بویوردو هئچ بیل کی سنین طرفینده هئچ خبر مبر یوخدور تای قولاق بیرعابباس آدیندا ملعون نئچه باشقاسی  الله سیزو قاچاق خانین نقشه سیله نئچه کندین آداملارین سویوب وحیزبین آدیلا قاچیبلار ؛ ایندیسه ده اونلاری قارلیق یولوندا دوتوبلار ، دستور وئرمیشم او ملعونلاری بورا گئتیرلر گؤرم اونلارین داها نمنه نقشه لری واریمیش . آغا ائله دؤننلری بوایش بیزیم کندین چؤلونده بو ایکی بئچارایا اوز وئریبدیر.اونلارین نم نیشانین ائله بولار منه دئجه گین من او ملعون تای قولاغ عابباسی تانادیم گئچمیشلرده او توممتین شاهین داشین چوخ سینه سینه ویراردی بس ائله اوزلریدی آغاائله اوناگؤره ده قوللوغونوزا گلمیشیک .

امیر نصیری  ( زنگانلی ائلمان )