قوجالمیشام
قوجالمیشام
قوجالمیشام ، گوجدن دوشوب بیله ییم
داریخیبدیر گئچمیشلره اوره ییم
اوشاق کیمی لاپ چوخالیب دیله ییم
داها منه باشقا دونیا ، دولاشیر
اؤز گؤزومو دومان آلیب چن آلیب
خزان دوشوب عومور گولوم سارالیب
اوره ییمی خلور خلور غم آلیب
داها بو گون هامی منه ساتاشیر
آیاق اوسته دورماق کیمی آشیرام
دنیز کیمی دالغالانیب داشیرام
بو دونیادا سون گونلری یاشیرام
یالقیز دئسن بو گون منه یاراشیر
پوزولوبدور نار ناقیشلی پالتاریم
دا سسلنمیر خاطیره لی گؤی تاریم
الده ن گئدیب آتام ، آنام ، دیلداریم
ایندی منه آجی حسرت دولاشیر
اوشاقلاریم داها منه یئتیشمیر
سئرچه لرده دوزاقیما ایلیشمیر
یوخودا دا الیم یارا یئتیشمیر
من قاچیرام ، آمما داغدان یار آشیر
داریخیرام هؤنکور هؤنکور آغلیرام
قاپ باجانی هر کیمسه یه باغلیرام
گؤزیاشیملا اؤز گؤزو مو یاغلیرام
خیالیمدا مین یئر لره یول آشیر
گئجه اولور بیر سس گلیر کؤچه ده ن
اوشاقلیقدا سئیر ائدیره م نئجه ده ن
ایسته میره م صوبحه چیخام گئجه ده ن
شوملاییب دیر داها عومور سولاشیر
ایندی بو گون داشا دؤنوب چؤرگیم
یانسیلانیر یئریشیگیم یئریگیم
آرالانیب دا ناخیردان اینه گیم
باش گیجه لیر قیچیم قیچا دولاشیر
گلین دئییر کیشی بیر چیخ ائشیگه
اوشاق دئییر قوجا گل مین بئشیگه
اوینادیرلار بنزه دیرلر پیشیگه
دئییر لر کی سنه کؤچه یاراشیر
شیکایتیم واردی منی یارادان
یورولموشام بو نیسگیلده ن ، یارادان
آپارگیلان داها منی آرادان
نئیلیره م من دوتاق باشدان وار آشیر
قوجالیقدا (( ائلمان )) گؤزه ل دونیادی
هم آجینین ، هم شیرینین وار دادی
اینجیمه چوخ دونیانین هر بیر زادی
گئدرگیدی زامان بیزه دولاشیر
امیر نصیری ( زنگانلی ائلمان )
1386 خزل آیی
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.