ائل قایغی سی
ائل قایغی سی
اولکه میزه بو نیسگیلی کیم سالدی
دونیا بیزه تانریم یامان دار قالدی
آیریلیغین سر حدلرین چکدیلر
بیز بوتایدا اوردا قارداش یار قالدی
ناتوانین باغچاسینا اود دوشدو
چیچکلرین بوغازیندا دار قالدی
ایکی گؤزون یاشی آخدی بیر چایا
آنا باجی قارداش گونو زار قالدی
یاسا چؤندو توی مجلیسی داغیلدی
یار گلمه دی مژملرده نار قالدی
آیریلیقین ماهنیسی نئی چالدیلار
قارا گلدی ائلین گونو تار قالدی
بو آرادان سور سولوکلر گون گلیر
قانلار سؤروب دامارلاردان بار قالدی
تولکو، چاققال ، قودوز قوردلار نه یامان
وارلیقلاری داغیداراق هار قالدی
قاراباغ دان گونش اوزو کسیلدی
قارا گلدی گونو گوندن زار قالدی
دوشونجه نی ، دوداغلاری تیکدیلر
آنالارین دیلی گیریفتار قالدی
دانیشدیغی سؤزدن دؤندو یولداشلار
گؤرن تانریم دوزگون بیر ایلقار قالدی!؟
آشیق هاردا قالدی زنگان هاواسی !؟
هم ساز قالدی رفده همده تار قالدی
چایلاقلارین سولارینی کسدیلر
چؤلده آنجاق بیر قورو شار شار قالدی
(( ائلمان )) سنه بو دونیادان پای نئیلیم
ائل قایغی سی نیسگیل نیسگیل وار قالدی
امیر نصیری ( زنگانلی ائلمان )
16/11/1386
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.