زنگان گوزگویه باخیر
گوزگو همن آینادیر سئوگیلیم!
گوزگویه باخسان اؤزونو تانییاجاقسان
زنگان دا اؤزنو تانییاجاق
دوغرو دئییرم سئوگیلیم
زنگان گوزگویه باخیر
اوگون من زنگانی ایچدیم. سعیدلی، جلیللی و علیرضالی زنگانی
اولسون کی سعیدله تیمچهلره گئده بیلمهدیک
و اولسون کی دایانامادیم زنگانی،
لئیلالی و بهروزلو دا گؤرم.
اما زنگانی ایچدیم
«داغدا داشلار
باغدا قوشلار
و جمده
یولداشلار ساغلیغینا»
اوشاغلیغیمین مین بیر یاماغا چئوریلیب، زنگانا جالانمیش بؤلوملرینی شهریمین اسکی کوچهلریندهن بیربیر ییغیشدیردیم، هه! ییغیشدیردیم آمما قاییدان باش؛ یئنه جالانیب زنگاندا قالمیشدیم.
قهوهخانادا حکیم هیدجی اوخودوق. بیریسی معجزچی، بیریسی کریمیچی. آرتیق قویمادیلار چای پولولاری دا اؤدهیک: «واللاه اولماز، آتقی آلماگینان… »
زنگان گوزگویه باخیر
زنگان گوزگویه باخماییر
زنگان گوزگویه باخیرمیش
من گئدنده الی ساپاندلی چیلغین اوشاقلاری گؤردوم، بوتون گوزگولری سیندیریردیلار. بو گوزگولر پاس توتوب، یوخ بو گوزگولری پاسلاندیریبدیرلار. بو گوزگولر داشا چالمالی یا خود داشی بو گوزگولره.
ائنین قیزیل اؤزهنه. ائنین زنگان چایینا و داغلاردا جوشان آری بولاقلارا.
اورا دا اؤزونوزو تام گرچک شکیلده تانییاجاقسیز.
زنگان اؤزونو تانیییر. بونا امین اولدوم و کیملیییمی نفس چکیب دوغما یوردومدان آیریلدیم.
آیریلا بیلمهدیم…
سید حیدر بیات
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.