پوزولمایان یازی
پوزولمايان يازي
توپلايان: محمد رزاقي(زنگان)
يازيلان يئر : آشيقلار قهوه سي
ناغيل سؤيله ين : اوزوكچو حيدر- 65 ياشلي
يازيلان تاريخ :2/10/1383
کئچن زامانلاردا بير کيشي واريدي ، بونون ايشي چؤللردن ورک درمگ ايدي . بو کيشي گونده گئديب چؤللردن ورک دريب گتيرردي؛ شهرده ساتيب ياشاياردي . گونلرين بير گونو ورهگي چيخارداندا گؤردو ايکي دنه قيزيل يومورتا . اؤزاؤزونه دئدي« آللاه ايستهسه دايانيب قوشونودا توتارام ؛ بير آز زامان دايانميشدي قوش گلدي قوندو يومورتانين اوستونه .کيشي بورکونو باشيندان گؤتوروب ياواشجا قوشون اوستونه قويوب؛ قوشودا توتدو. قوشوگؤتوروب گلدي ائوينه ساري .يومورتالارين بيريني اوتاغين بويان تاخچاسينا قويدو بيريسينيده او بيري تاخچايا. اوتاق يومورتالارين ايشيلتيسيندان گونش کيمي اولموشدو . بير تاجرين يولو بو کنده دوشدو. بيردن گؤردو بو کندده بير دام گون کيمي ايشيلليير.بويوردو قفله قاتير سو قويوسونون يانيندا اوتوراق سالديلار. اؤزو گليب ورکچي کيشينين يانينا دئدي: قارداش بو يومورتالاري سات من آليم. ورکچي دئدي: يوخ اولماز. تاجير دئدي: دام دولوسو گوموش پول وئرهرم. ورکچي کيشي دئدي: من بونو سنه ساتسام گئديب دئيرسن کيشي مني آلداتدي. تاجير دئدي: اللاها آند اولسون بئله بير سوز دئمهرم. تاجير يومورتالاري آليب يولا دوشدو. بو اولايدان بير ايل کئچدي. ورکچينين ياشاييشي ديرچلدي. آروادينين آياغي آغير. تاجيرين يولو يئنه بوردان دوشدو. گوردو ورکچينين دامي يئنهده ايشيقدير. دوروخسوندو ورکچينين يانينا گئتدي. ورکچي بونا چوخلو خيدمت ائلهدي. تاجير دئدي: بو يومورتالار هاردان گلدي. ورکچي جاواب وئردي: قوش گئنهده يومورتا دوغدو. تاجير سوروشدو: قارداش آروادين هاردا جاواب وئردي. او بيري اوتاغدا اوشاغي اولور. اوشاق توتانلاريدا ملاکهلردندير. اوشاق آنادان اولدو. ملاکهلرين بيري دئدي: تاجيرين قيزي بو اوغلانا يازيليب. بو سؤزو تکجه تاجير ائشيتدي. اؤزلوگونه دئدي: من بو يازيني پوزارام. ورکچييه دئدي: قارداش بو بلهيي منه سات. ورکچي دئدي: اولماز. چوخ دانيشاندان سونرا ورکچي راضي اولوب اوشاقي تاجيره وئردي. تاجير اوشاغي گوتوروب يولا دوشدو. اوشاغي گتيريب وئردي نوکره دئدي: آپار بو اوشاغي اؤلدور. نوکر گتيريب، اوشاغين اوستهکي کوينهييني چيخارتدي. بير دنه گؤيرچين گليب قوندو اوشاغين يانينا. نوکر گؤيرچينين باشين کسيب قانين ياخدي کؤينهيه گتيردي، تاجيره وئردي. اوشاغي بير يابانجي آدام تاپيب گتيرير، ورکچينين يانينا. ورکچي دئيير شايد تاجيرين ياديندان چيخيب يولدا قاليب. ساخلارام بؤيوير. سونرا تاجير گلنده وئرهرم بئلهسينه. بو اوغلان بؤيودو 20 ياشينا چاتيب، ددهسينين باغ باغاتينا يئتيشيردي. تاجيرين يولو يئنه بو کنده دوشدو. يولدان گلديلر. تاجير گؤردو بير گؤزل اوغلان يول اوسته دايانيب. تاجيرين يولون کسدي، دئدي :آتلاريزدان انيب باغدا اؤزوزه يئتيشين. تاجير اوغلاندان سوروشدو: سن کيمسن اوغول؟ دئدي: من ورکچينين اوغلويام. تاجير فيکره گئتدي. دئمهلي اوغلان اؤلمهييب تاجير ورکچينين يانينا گليب. يئنه اوغلاني بير دامين دولو گوموش پوللا آلدي. اؤز آتيني اوغلانا وئردي. بير نامه يازدي «بو نامهني گتيرهني يئتيشسه گئجه- گوندوز گلسه گوندوز اؤلدور» نامهني اوغلانا وئريب، دئدي: آپار بو نامهني منيم اوغلوما وئر. اوغلان گليب، تاجيرين شهرينده تاجيرين قيزينا توش گلير. قيز اوغلاندان خوشو گليب، اوغلانين يولون کسدي. سوروشدو: اي اوغلان سن هارا گئديرسن؟ اوغلان نامهني گؤرسددي. قيز نامهنين يازيسين، پوزوب يئنيدن يازدي: «بو نامه گتيرهني گئجه يئتيشسه گئجه گوندوز يئتيرسه گوندوز، قيزيمي وئر بو اوغلانا ،تئز تويون ائله» نامهني وئريب اوغلانا يوللادي. اؤز قارداشينين يانينا تاجيرين اوغلو نامهني آليب ايچهريسين اوخودو ائله او گون اوغلاني قيزا عقد اوخودولار تويلاري باشلاندي. تاجير گليب چاتدي گؤردو ورکچينين اوغلو هله ديريدير. اوزونه گتيرمهدي. يئنه بير نامه يازدي «بو نامهني گتيرهني سال ايستي سويون ايچينده اؤلسون» دئدي: اوغلان بو نامهني آپار وئر حامامچييا. اوغلان نامهني آليب، آپاراندا تاجيرين اوغلو گؤروب سوروشدو هارا گئديرسن؟ ورکچينين اوغلو دئدي: گئديرم حامامچينين يانينا. تاجيرين اوغلو دئدي: نامهني وئر من آپاررام تاجيرين اوغلو نامهني آپاريب نامهده يازيلان کيمي حامامچي بونو سالدي ايستي سويا اؤلدو. تاجير بو ايشدن ناراحات اوغلانلا قيزي ساليب قاباغيناشاللاق وورا وورا چوله ساري يولا دوشدو. شاللاغين اوجو بيردن قاييديب اؤز آتينا دئيدي آت قيچلارين قووزاييب تاجير آتدان دوشدو. هئللهنيب بير درهيه، بوينو قالدي قارني آلتيندا اولدو. اوغلانلا قيز هر نه وارلاريدي گؤتوروب گلديلر ورکچينين يانينا. عؤمورلرينين سونوناجا اوردا ياشاديلار.ايندي بونا گؤره دئميشلر:
عزيزيم يازيلاري
من اوخورام يازيلاري.
هئچ کس پوزا بيلمز،
تانريدان يازيلاري.
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.