آچیق قوشقو/ پرویز سودی
هیس: هله واز گئچ مندن
دا، دانیشمام گلمیر
نئچه کی راجی بویون قیسمایاجاق اورماندا
گؤبه لک لر ده گونشدن ساری له له ووراجاق
یا قرنفیل گومان کندینده او بیچیلمیش بوغازیندا نمه لر سؤیلوردو
ائشیدندن سورا گول بورنونو یارپیزلار اوغوندورموشدو
دوشونندن سورا سالداق سؤیودون تورکوسو دیلدن دوشدو
ایکی آددیم لالادان بویمادرندن ایره لی دؤنسن اویانلاقلاردا
داغ ایچین چکمیشیدی. حیف اولسون. حیف اولسون کی بیری اولمادی شاهید گتیرم
بیز اینانمیردیق کی. هله واز گئچ مندن دا دانیشمام گلمیر.
ائله زیتون لاخاسین شوخلوغا توتدوق گولدوک. یا دا هیز گؤزلری
ییکتیک او یئتیم. یوخشا شور گؤزلری قویدوق قالدی، هانکی نامحرمین
ابلق گؤزونون سئیرینده و یالین اللری آشماز قویدوق سارماشیقلارجا
گوناهسیز آغاجین بوینوندا
یا سویون آبرینا ال ووردوق
یاخچی بیلدیک نییه سؤزلر آرادا دنک اولدو و موغام پرده سی آز
گؤیچه حالیندان اویانا، دیل غمی سمفونوسوندان چیخدی.
و غزل گؤوده سی باش ساغلیغی گؤندردی اونا
قاراچی اؤز کؤکونه دایرا چالیب اوینوردو. و منیم
سس سوراغیمدان سورا آغ بیرچک ساز، هوپ دوتوب
هیس دییه رک جومدو سوکوت آنلامینا
یانی: یانی واز گئچ مندن دا
دانیشمام گلمیر.
پرویز سودی/ زنگانلی دالغا
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.