يولداشيملا بيرليکده زنگان کوچه‌لرينده دولانيرديق. يولداشيم زنگانلي اولماديغينا گؤره اونا زنگانين اسکي يئرلريني تانيتمايا باشلاديم. زنگانين حوسئين‌يه مله‌سينه گئتديک. دار دودوک کوچه‌لري بير بير آرخادا قويدوق. زنگانين اسکي قالا دووارينا بير گؤز آتديق.

 چوخ زامان اؤلور آشيق‌لار قهوه‌سينه يولوم دوشمه‌ميشدي. يولوموز آشيق قوه‌سينه دوزلدي. افضل قوه‌سينه گئتديک. قوه ايکينجي قاتدا، اوزو تئهرانا ساري باخيردي. چيخديق اوسته، يئر ساليق وئرديلر اوتوردوق. تبريزلي آشيق اشرف حوسئين پور دا ساز چاليب، اوخوردو. زنگانلي رحيم حئيدري ده بالابانيلا اونا يارديم ائديردي.

 بير چاي ايچن کيمي آشيقدان بير هاوا ايسته‌ديلر. سونرا آشيق ميرزه‌لي خودايي قريب دستانينين سون بؤلومونون اوخونماسيني ايسته‌دي. ايندي دستان دئمک آشيق قوه‌لرينده آز گؤرونور. قريب دستانينين سون بؤلوملري اوخونمايا باشلاندي. قوه‌ده اولانلار سوسوب، دينمه‌دن دينله‌ييرديلر. ساز، بالابان بير ده آشيغين سسي آچيق پنجره‌دن زنگانين هاواسينا ياييملانيردي.

بو آرادا سورخعلي بابايی، بابانچي رحيمي ساخلاييب يانيندا يئر وئردي. ايلک سانديم رحيم ائله اؤزو اوتوروب. سونرا بللي اولدو، يوخ «بالابانچي ساخلاما» بؤلومو ايندي بوردا يارانماليدير. آشيق اشرف گلدي «کنديميز» هاواسيلا اوچ بند سؤز اوخودو. بالابانچي دوستاقدان بوراخيلدي. دستان بيتدي. بيز ده قوه‌دن آيريلديق.

 آشيق‌ين چالماسي يولداشيمدا اولوملو ائتکي بوراخميشدي. سوروشدو: بي! ندن بيزيم تيلویزييونلاريميزدا بئله موسيقي‌نين يئري بوش گؤرونور؟
قيساجا بئله دئديم: بونو ايش اوسته اولانلاردان سوروشماليسان.
دوشونه، دوشونه يولوموزو آديملاديق.

1391 گوز – زنگان

 

Yoldaşımla birlikdə zəngan küçələrində dolanırdıq. Yoldaşım zənganlı olmadığına görə ona zənganın eski yerlərini tanıtmaya başladım. Zənganın hüseyniyə mələsinə getdik. Dar düdük küçələri bir bir arxada qoyduq. Zənganın əski qala duvarına bir göz atdıq. Çox zaman ölür aşıqlar qəhvəsinə yolum düşməmişdi. Yolumuz aşıq qəvəsinə düzəldi. əfzəl qəvəsinə getdik. Qəvə ikinci qatda, üzü tehrana sarı baxırdı. Çıxdıq üstə, yer salıq verdilər oturduq. Təbrizli aşıq əşrəf hüseyn pur da saz çalıb, oxurdu. zənganlı rəhim heydəri də balabanıla ona yardım edirdi. Bir çay içən kimi aşıqdan bir hava istədilər. sonra aşıq mirzəli xudayı qərib dəstanının son bölümünün oxunmasını istədi. Indi dəstan demək aşıq qəvələrində az görünür. Qərib dəstanının son bölümləri oxunmaya başlandı. Qəvədə olanlar süsüb, dinmədən dinləyirdilər. saz, balaban bir də aşığın səsi açıq pəncərədən zənganın havasına yayımlanırdı. Bu arada sürxəli babayə babançı rəhimi saxlayıb yanında yer verdi. Ilk sandım rəhim elə özü oturub. Sonra bəlli oldu, yox "balabançı saxlama" bölümü indi burda yaranmalıdır. Aşıq əşrəf gəldi "kəndimiz" havasıla üç bənd söz oxudu. Balabançı dostaqdan buraxıldı. Dəstan bitdi. Biz də qəvədən ayrıldıq. Aşıqın çalması yoldaşımda olumlu etki buraxmışdı. Soruşdu: bəy! nədən bizim tilvziyonlarımızda belə musiğının yeri boş görünür?

Qısaca belə dedim: bunu iş üstə olanlardan soruşmalısan.

Düşünə, düşünə yolumuzu adımladıq.

 

1391 güz – zəngan