«میثم کریمی »نین بیر شئعرینه قیسا بیر باخیش

منه هئچ نه داها اؤنملی دئییل

نه قیش گونو، نه یاز فصلی، نه باهار

هر نیی کی منده دیر لی گؤرسن

وار- یوخومو اودلامیشام گل آپار

 

جان اوسانیب ، باش هاوالی، قاتمیشام

اینان گینان چیلغینلیغا چاتمیشام

عشقینی کی چوخ- چوخ داندی آتمیشام

یولدا قالان یولچو وارلیغین ساتار

 

خاطیرینده ایزلریمی آز – آرا

آرخایینام گله جکسن آزارا

بو گونلرده یولون دوشسه بازارا

گؤره جکسن منیم کیمی چوخ ساتار

 

گؤزوم سنی گؤرسه عقل یولون چاشار

صبیر کاسام تئز – تئز دولارتئز داشار

اورک سنسیز آنجاق ایکی گون یاشار

 وار من اوزه ن چایین یولوندا شار – شار

 

هویول سیلد­یم یاشلا دولان گؤزومو

اوندا بیلدیم ایتیرمیشم اؤزومو

سنه آنلاتمالی بو سون سؤزومو

مکتوبدا یازمیشام گتیریر چاپار

وار – یوخومو اودلامیشام گل آپار

 

سایین و حؤرمتلی  یئنی یئتمه شاعیر لر:

 

 

دئدیگینیز نامه قالیبینی بو شئعریده دویا بیلمه دیم. یا منیم آخساق بئینیمد ن یا بو نامه نین قیریق و تأکید سیز بولوملرینده ن دیر. آنجاق بونو یازمالییام سیز دوستوما نامه تئکنیکی گرک اوخوجویلا شاعیرین آراسیندا ، شئعرین ایلک بؤلوملرینده قرار باغلاسین . یانی اوخوجو شئعرین باشلانیشیندا بئله بیلسین کی بیر نامه نی آچیب و اوخویور و سونوندا اونامه نی حیس ائلییه بیلمه دیم. شئعرین آخیریندا کی میصرع بونو وورغولویا بیلمیر. اولا بیلیر بیلمدیگیمیز میصرعلرین دئییشمه سیله و بیر ایکی یول بو شئعرین یازیب – پؤزماسیلا ایسته دیگیمیز مقصده چاتاسیز. هر حال بو ایلکین قوشما اؤز اؤزونه بیر دیرلی شئعرینه صاحیب دوروبدور .اوخودوغوم بو ایلکین قوشمانی سیزدن سایین دوستوم ( میثم کریمی) منی سئویندیردی . گؤزوموز آیدین . بو یازغی بو شئعرین حاقیندا دئییل. بو سایاق قوشمالار تورک دیلینده ایندیه دک چوخ یازیلیب . آمما بیلدیگینیز کیمی قالارغی قوشمالارچوخ آز اولوب . چاقداش ، آدلیم شاعیر و قوشماچیلارین بیریسی نوصرت کسمنلی دیر. دیققتله اونون آدلیم قوشمالارین آراشدیرا بیلسک ، آیدین و اؤنملی نوقطه لره چاتاریق. اونلارین ان اؤنملی سی قوشما قالببین سون میصرع لری و او بولومون سؤزونو ( آنلام و فضانی...) سونوجا یئتیرن قیسمتی دیر. موفق قوشمالارین تورک دیلینده ساییسی چوخ آزدیر. اساس سؤز قوشمالار دا منجه گره ک بیر شئعرین باشلانغیجیندان سونونا

 د ک اؤزونو هر بیر بؤلومده گؤسترسین. بونا گؤره شاعیر ساده جه تئکنیک لردن فایدالانمالیدیر. سئچیب بئینینده کی قونوسونون لاخ- بوداغلاریندا مانوور وئرملی دیر. بیلدیگینیز کیمی هر بیر موضوع دان اولا بیلیر نئچه پارچا آنلام ائشیده نین یوخسا اوخویانین بئینینه چاتسین بو آرادا شاعیرین بئینینده کی آنلام سون درجه اؤنملی دیر. اونو اوخوجویا بیلدیرمک ایچین شاعیرمحسوس و ملموس تصویر لر یا آیری شئعیر صنعتلرینه سیغینا بیلیر. اونلارین بیریسی سیز سئچدیگینیز اساس موضوع « چیلغینلیق» دیر. بو موضوع چوخ شاعیر لرین شئعرینده قاباریلیب . آمما نهایت اونودولماز شئعرلر چوخ آز دیر. گونئی آذربایجان قوشماچیلارین بئینینده گزن قونولار البت اوتای آذربایجان شاعیرلرینه گؤره بیر کؤرپه اوشاق ساییلیر. سیزین بو دیرلی و ایلک قوشما کیمی شئعریز منیم اوچون چوخ گؤزل و شاشدیریجی ایدی. هر حال قوشما 11  هیجالی اولار . بو شئعرینیزده بو آخساقلیقلار چوخ گؤزه چارپیرسادا منجه ایصلاح اولا بیلر. بو قوشمانین سون میصرالاری گؤزله دیگیمیزوورغولاری  اوخوجونون بئینینده سسلندیره بیلر. خاطیرلاتمالییام اوچونجو بؤلومده شاعیر قافییه سیخیلتیسیندا قالیب بیر آیری هاوایا گیریشیبدیر کی بو سایاق دئییشیکلر هر بیر شاعیرین شئعرینده گؤزه چارپار. اومودوم وار گئت- گئده آیری یازدیغیز شئعرلریزده بو کیچیک آخساق لار چؤزولسون . چاغداش شاعیرلرین قوشمالاریندا یا آیری قالیب شئعرلرینده تکجه بیر موضونون یان- یورسینده سؤز قوشوب مانوور ائتمه لرینی دیققت له ایزله­یه بیلرسیز. اوغورلار آرزولایمدا سیزین اوچون.

علی اصغر اوجاقلو( سرین) 28/3/1386