(ماحموت خان )

 

گؤن اورتا چاغي چالغيمي (سوپورگه مي)  آلديم اليمه خرمنه ساري گئده م ، رحمتليك آنام اول زامان ساغيدی، تاققيل تيمي ائشيديب دئدي: آراز هارا گئديرسن ؟ ايستي آز قالير آدامي    پيشير سين  دئديم: آي آنا گلیره م ،  ايستيره م گئده م بوغدالارين ال آياغين سوپوره م ، دامدان باخاندا گوردوم ائله بيل تويوق لار خرمني دئشه ليير ديلر ،

ياخشي ، اوغلوم ياخشي يول ،قاييدان باش گور  كند ايچه ريسنده  نه خبر وار ، ائله بيل دئيير ديلر خانین آداملاری  کنده گلیبلر  ، دئمه لي كد خدانين ائوينده دیلر  ، بيرده باشارا بیلسن بير آز درمه در گتير ، اول ديلسيز اينه گي باغلاميشام قاليب دامين ايچه ريسينده ، آخي گئچن گؤن مشد بايرام گليب باخدي ،  دئدي كي داباق اؤلوب دور ، هه له نئچه  گؤن چوله چئخارتمايين ،

ياخشي آي آنا  گئتديم تئز قاييدارام ، سنده گئت بولاغدان بير آز سرين سو گتير هاوا چؤخ ايستي دير ، گون اورتایا  دوغرا اماش  دوزه ل ده ك .

خرمنه يئتي شيب گؤردوم هه ! ايله بيل تويوقلار بوغدالاري  كؤرلاشديريبلار ، آخي يئني جه بوغدالاري دؤيوب يیغميشديق خرمنه  ، باخديم گؤردوم ییئیه سيز تويوقلار خرمنين داليسيندا اؤزلرينه سيرفا آچيبلار  ، نه قده ر بير يئرده آرپا ، بوغدا واريدي هاميسيني سؤوو رموشدولار ،  دوغروسو  اؤزلرينه بير خرمن سالمیشديلار ، تئزليكجه سؤپورگه ني گؤتوروب تله سه تله سه خرمني سؤپوروب داغيلان بوغدالاري بير يئره ييغيرديم كي اولماسين بيرده ن ماحموت خانين نايبي ، يوخسا كد خدانين آداملاري بو قارما قاريشئقدا مني گؤروب اؤغرو دوتسونلار ، آخي اؤز اكديميزيده كد خدايلان  خانين   اجازه سي اولماسايدي دريب يئغيشديرا بيلمه زيديك ، ايله بو فيكير له ريله چالئشير ديم كي بير سس گلدي ، گئده كيمسه نين اوغلوسان ؟ دالي سورا     چونه نده  گؤردوم هه ! دده م واي ضاليم  ماحموت خان اؤزو دور ، ديليم توتولدو   سا. .  سا . .سا . .  سالام ،  خا . . خا . . خا. .  خان آقا نو . .نو . نو . نوكرین قوجا عابباسين اؤغلويام ، باشا دوشدوم  كي آنام دييه نیمیش ، ياخينلاشيب منه بير ديققه تيله باخيب دئدي : آتان كوپه گ اوغلو هاردادير ؟ منيم داها ديليم توتولوب بير زاد دييه بيلمه ديم، ايكينجي سؤرغوسون بير دده لي ننه لي شاپالاغيلا سؤروشدو ؛  قورخومدان اليمي اؤزومه آپارا بيلمه ديم ، اوچونجو سؤزونده چيئغيردي  كد خدا گؤزلريميز آيدين بويله  كي بيلينير بو كتده اربابليق حاققي زاد ييغيلماياجاق سنله هله سونرا ايشيم وار . ایندیسه بو اؤغرونون آتاسين تاپیب تئز گتيرين گؤروم اول   نجور آدامدي كي بويله جسارتين صاحابي اؤلوبدور !؟ اوغلانيدا آپارین كندين اورتاسيندا باغلاييب جار چكين هامي گؤرسون كي من ماحموت خان بو گون   ايسته ييره م  قارشيمدا  دايانانلاريلان نجور چيخيشام .

گؤن اورتانين ان پيشيره ن چاغي منيم ال قولومو باغلاييب كندين اورتاسيندا ساخلا ميش ديلار ،  كتديلري ائوده ن ايشيگه چكيب گتير ديلر كي منه باخسينلار ، كندين آداملاري هئچ ائله بير مني تانيمير ديلار  ، ائله بير باشقا بير كتده ن گلميشديم  ، اونلارين هامیسی منه  بير اؤغرو گؤزونده باخيرديلار ، آنجاق نئچه ساهاتدان سونرا آخشامين سرين چاغي سسله ديلر خان گلير هامي تيتيره تمه گه دوشموشديلر ، منيم تكجه گؤزوم يولدايدي كي نده ن آنام گلمه ييب ، بيرده ن گؤردوم قونشوموزون اؤغلو بابك ياواشجا منه ياخينلاشيب دئدي : آراز بير سؤز دييره م آمما قورخماياسان ، دئديم تئز اول ده گؤروم نه اؤلوب ،  دئدي من كي بيليرم گئرچک نئدي ، خانين ائوي ييخيلسين سنده ن اؤ غرو چيخماز آمما آتایلا آناوا يئتيريب لر كي سن اؤغورلوق ائیله ینده خان اؤزو گؤروب ، دي گؤروم بئله دي يا يوخ ؟

هه ، اينديسه اؤز خرمنيميزه ده آياق قويساق او غرو آدلاناجاييق ، بابك دوغروسون ده گؤروم آنام هاردا ،  نده ن  بورايا گلمه ييب ،   هئچ زاد اولماييب تكجه آنان قؤرخوب اونا گؤره   ييخيليب  . ييخيليب !؟  يوخ آراز هيچ زاد ، ايله اول يئخيلما اؤلدو كي آنام داهاهئچ زامان  دورمادي ، بيزيده كتده ن اؤغورلوق آدينا چئخارتديلار ...

 

امير نصيري (زنگانلي ائلمان )

1385