یالان سئوگی
گؤزلرین گؤزومه ساتاشان زامان
آند ایچدیک دونیالار بیزیم اولاجاق
سارماشیق لار کیمی قول بویونلاشدیق
سن دئدین، هر نه وار بیزیم اولاجاق
سئوگیدن باشلادیق کؤرپو قورماقا
یالواردیق زامانا، سن آلله، دایان
گئجه لر، سوکوتون آردین ایسته دیک
اولدوزلار باخمادان، هئچ یورولمادی
ملک لر موقددس سئوگینی گؤروب
کئشیک لر باشلاندی، سس سیز، سمیر سیز!
تانریدا دیسگیندی، بو، نه ایش دیسه!؟
بیر بئله سئوگینی من جالامیشام!؟
حیرصله نیب بیر آندا هر نه دایاندی
سونراسی نشئه لندی اؤز ایشینه
بویوردو:« منی ده تامارزیتدیلار»
اصلی سی، کرمی یادینا دوشوب
گولومسه نیب، دئدی:« سالیغلار سیزه
سالیغلار، سالیغلار، سالیغلار سیزه»
دوداقلار ایستی سین گؤرنده گونش
اوتانیب، اوساندی اؤز ایستی سیندن
گؤزلریم گؤزونه شاتاشان زامان
دئدین بو سئوگینی تاریخ یازاجاق
سؤیله دین اسه جک داغلارین یئلی
اولاجاق یام یاشیل، تارلالار تئلی
آلاجاق باشینا، تورکولر ائلی
هر نئسه سئوگی وار بیزیم اولاجاق!
شنلیگین قاطاری دورنالار کیمی
گزیردی او زامان یئر گؤیوموزده
تیکیلدی ائویمیز اوره ییمیزده
او زامان سئوگیلیم، آند ایچدیک آخی!
ایندیسه تاریخی ایزلیرم آمما!
هر نه وار سؤورولوب واراقلاریندا
آتیرام الیمی تئللرینه من
نیسگیله باتیلیر گوناهسیز اللر
واراقین بیرینده ائویمیز اوچوب
بیر دیره ک قالیبدی پاپاقی تؤزلو
قاپی سی گؤره سن نئدن آچیق ایمیش
بلکه ده گؤزلری یولدا قالیبدیر
باخیرام او دامدان اولدوزلارا من
گؤز یاشی اله نیر اوستومه آنجاق
اورادا یالنیز بیر فریاد قالیبدیر
شیرینی یوخ اولوب، فرهاد قالیبدیر
یاز کؤچوبدور اوندان بیر آد قالیبدیر
بیر اغاج سارالیب، لاپ یاد قالیبدیر
یاشیل بیر واراقی تاپا بیلمیرم
یاشیل بیر واراقی تاپا بیلمیرم
او شیرین آنلارین هاواسیندایام
تاریخین گؤره سن هاراسیندایام؟
واراقین بیرینده تانری اغلاییر
بیرینده ملک لر اؤزون دانلاییر
گؤوه نیر اؤزونه گونش بیرینده
بیرینده گؤرورم تارلالار یانیر
دورنالار قاطارین گؤره بیلمیرم
شنلیگین خبرین آلا بیلمیرم
نئجه اولوب او گونلر؟ بیر آنلیق ایمیش
بلکه ده هاوا سؤز، اوشاقلیق ایمیش!
یوخسادا نه بیلیم یوخو ایمیش، آنجاق
بیلمیرم هارانین هاراسیندایام
بیلمیرم زامانین هاراسیندایام
هانسی بیر دردیمین، چاراسیندایام
گؤزلرین گؤزومه ساتاش سا بیر گون
بلکه ده سؤن باخیش اولاجاق منه
بلکه ده دونیالار منیم اولاجاق
بلکه ده هر نه وار منیم اولاجاق
گؤزلرین گؤزومه ساتاشان کیمی
امیر نصیری(ائلمان) 4/4/1389
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.