گولمه جه ( طنز )
(( آلاجاقلی ))
دونیا اوچور بیر ده ن منیم باشیما
بیر فیرتینا دوشور قالمیش یاشیما
ائله بیل کی ککره چؤ کوب آشیما
قاپیمیزا آلاجاقلی گلنده
ال تیتره ییر،چایدان آشیر، اود سونور
الیمده کی شربت زه هه ره دونور
گؤز قارالیر، قیچ ایلیشیر باش چؤنور
قاپیمیزا آلاجاقلی گلنده
اوشاق دئییر آتا ، دئییره م زه هه ر
دوستاق اولور منه گئنیشلیگ شه هه ر
هئچ بیلمیره م بو نه ایشدی نه ته هه ر
قاپی میزا آلاجاقلی گلنده
آغزیمدا کی چؤره ک دونور حاراما
قارداش قاچیر، قونشو دوتور قاراما
ائله بیل کی دوز سپیرلر یاراما
قاپیمیزا آلاجاقلی گلنده
تیکه قاچیر بوغازیما نه یامان
آرواد دئییر اؤلدو کیشی آی آمان
بو نه ایشدی داشا دئیسین بو زامان
قاپیمیزا آلاجاقلی گلنده
ائله بیل کی یئر برکدی یئر قازیرام
ایتیریرم اوزومو تئز آزیرام
گؤره ن آلله سون شئعریمی یازیرام
قاپیمیزا آلاجاقلی گلنده
رنگیم دونور قیپ قیرمیزی آلمییا
آرزیلیرام واختسیز قوناق قالمییا
گؤ ز قولاقلار منه نظر سالمییا
قاپیمیزا آلاجاقلی گلنده
آقلامیرام آمما گؤزه یاش گلیر
الیمده کی قیزیل منه داش گلیر
دانیشدیقیم آنلامازا باش گلیر
قاپیمیزا آلاجاقلی گلنده
دالغالانیر دنیز کیمی حیرص داشیر
بو آرادا شیطان نئجه سؤز داشیر
دوستلارداکی اوجا داغدان تئز آشیر
قاپیمیزا آلاجاقلی گلنده
قات قاتیشیق اولور بیرده ن قافیه
ائلمان بیلمیر نه سؤز یازا نه دئیه
خیال اوچور دویغو دونور لاپ چیه
قاپیمیزا آلاجاقلی گلنده
امیر نصیری ( زنگانلی ائلمان )
86.5.24
تورک دیلینده زنگین وارلی، عظمتلی، گئنیش، دولو و قیمتلی و . . . آنلامیندا گلیب.