يولداشلارلا بيرليكده داغچيلارين قوتسال  سئوديگي داغ (تكه قاياسي)دا گزيب دولانما قرارينا گلديك. دوزنله مه لر ياپيلاندان سونرا  سو (پنج شنبه) گونو گون اورتادان سونرا يولا چيخديق. زنگان – تربيز يولو ايله گئديركن عاليم قاسيم اوغلونون اوخودوغو ماهنيلارا قولاق آسيرديق. گئرچكدن بونون سسي بير سيحيرلي سسدير. گلميشم اوتاغينا اويادام سني قارا گيله ...، اوچو باشدان اولسا ايه بيلميرم.. و...آرديجيل بيزيم روحوموزو اوخشاييردي.

 قره آغاج كندينه يئتيشديك.  كتده دايانمادان يولا دوشدوك. يولون اوزونو هر كيمسه بيلديگي توركو ايسه شاركيني سؤيله مه يه باشلادي. بيري بيتمه دن  اوبيري اوخوردو. بير ساحات ياريم يول يئريمه دن سونرا تكه بولاغينين يانيندا چادير چالديق. تكه قاياسينين كؤلگه سينده ياشاماني دويمايا حاضير اولدوق. يئل گوجلو اسيردي. كند آداملاريندان بيري بيزه يارديم ائتمه يه گلميشدي. او سوروشدو گئجه ني بورادا قالاجاقسينيز؟

يولداشلار بيرليكده دئديلر: گلميشيك گئجه ني قايانين يانيندا ياتاق دا!

كندلي دئدي: گئجه قورتلار سيزي دؤره له مه سه ياخچيدي. اوشاقلار بيرليكده گولدولر.

كهليگ اوتو چايي، توهلوگه چايي دمله ييب دويونجا ايچديك. گئجه يئمه گيني ائركندن يئييب. شئعرلشمه يه باشلاديق. بيزه ياردمچي اولان علي بگ ساز چاليب اوخويانلاردان بيريسي ايدي. آشيق قريبدن باشلاديق علعسگره كيمي، خسته قاسيمدان، قورباني يا بوتون دستانلاري تكه قاياسينين اؤنونده يئني دن جانلانديرديق. تورك اولوسونون يازيلماميش تاريخي يئنه ده جانلاندي. 4 ساآت سورجينده گئچن شئعرلشمه وئرليشي بير كيپريك وورما قدري بيتدي.

 ائل گونو

يولداشلاريميزين بيري تكه قاياسيني الي يالين ديرماشدي. بيزلرده آشاغي دان اونون گؤيلرله قوجاقلاشماسينا  تامارزي اينسانلار كيمي باخديق. قايادان دؤنوب گون اورتا يئمه گيندن سونرا گلديگيميز يول ايله گئري دؤندوك.

تكه قاياسي باشيني هر زامان كيمي اوجا دوتوب. يولچولارينا خئير دوآ وئردي.

بيرده بو يئرلره دولان گل باري... .