انگلیسدن سوروشون مردم افغان نئچه یه؟

 احمد صادقی 1337 ده چایپارا بؤلگه سینده دوغولور. بئش یاشیندا مکتبه گئدیر. عایله نین مالی سیخینتی لارینا گؤره باش کند ده ایشله مه گه گئدیر. 13 یاشیندان  شئعر دئمه گی باشلاییب. 1362 دن بئله یه دوزگون شئعر یازمایا ال قویور. تورکجه ، فارسجا غزل لری زنگاندا اؤزونه بیر یئر آچیب. زنگانین چئشیتلی قزئته لرینده شئعرلری یاییملانیب. شاعیر شئعرلرینده «نافیذ» تخللوصو ایله تانینیر. بو شاعیرین بیر شئعر کیتابی یاییم ایچین دوزنله نیب. شئعر کیتابی لاتین و عرب الفابئتیله یازیبدیر. اوموروق بو کیتاب تئزلیکله ایشیق اوزو گؤرسون. کیتابدا اولان شئعرلرین بیرینی سیزلره سونوروق:

 

روضه ی رضوان نئچه یه

 

دوز دانیش واعظ الان روضه ی رضوان  نئچه یه؟

ساتیسان حوری غلمانی، دوغوردان نئچه یه؟

سن کی ایمان آلیسان مؤمنه،  جنت وئریسن

کفریلن قارقاریشیق  منده کی، ایمان نئچه یه؟

من طاماهکار دگیلم، وئرسه له بیر قصر بسیم

قالانین سات  گئده  هر کیم آلیر ارزان  نئچه یه؟

فرقی وار قیمتی دونیاده  آداملان آدامین

انگلیسدن سوروشون  مردم افغان نئچه یه؟

نییه بس اورپالی نین بیردنه بورونو قانامیر

تؤکولور قانی ولی گونده  موسلمان نئچه یه؟

بیری شیعه، بیری سنی نمه فرق ائیله یه جک

حاق ناحاق دائم  اولور، قانینا غلطان نئچه یه؟

اؤلسه ده آمریکالی بیل نیویورک اهلی دگیل

بیلمیرم هاردان آلیبدیر نئچه اینسان نئچه یه؟

تکجه شیطاندی دئییر  میللتی یولدان چیخادان 

آلیرام شیطانی  ای خالیق سبحان  نئچه یه؟

ایکی تومانیدی قندین کیلوسو شاه زامانی

گؤرگولن ایندی  وئریر دولت ایران نئچه یه؟

دوزدو دونیا باهالیقدیر؛  چوخالیب بیزده نفوس 

ساتیریق نفتی ولی،  بیز گؤرون الان نئچه یه؟

تؤکولوب سئل کیمی تیریاک، هیروئین، شیشه،کیراک

ساتیلیر کوچه - خیاباندا  فراوان  نئچه یه؟

لازیمیندیرگل آلیم  هرنئچه میثقال دئیه سن

آت بیر آز قوی ائله سین لاپ سنی میزان نئچه یه؟

« نافیذ» ین سؤزلری درمان جهالتدی جانیم

دگری واردی  بو درمانی  سن آلسان نئچه یه؟

بیلیرم ال به ال آینده گزر شئعرلری

دئیه جکلر هامی  گؤردوکجه، بو دیوان نئچه یه؟

 

 

 

 

 

Rozeye rizvan neçəyə

Duz danış va'ız alan rozeye rizvan neçəyə?

Satısan huriyi qılman neçəyə?

Sənki iman alısan mö'menə, cənnət verisən

Küfrülən qarqarışıq məndəki, iman neçəyə?

Mən tamahkar dəgiləm, versələ bir qəsr bəsim

Qalanın sat gedə hər kim alır ərzan neçəyə?

Fərqi var qimətidünyadə adamlan adamın

Ingilisdən soruşun mərdümi əfğan neçəyə?

Niyə bəs urpalının bir dənə burnu qanamır

Tökülür qanı vəli gündə müsəlman neçəyə?

Biri şi'ə, biri sünni nəmənə fərq eləyəcək

Haq nahaq da'm olur, qanına qəltan neçəyə?

Ölsədə amrıkalı bil niyoyork əhlı dəgil

Bilmirəm hardan alıbdır neçə insan neçəyə?

Təkcə şeytandi deyir milləti yoldan çıxadan

Alıram şeytanı ey xalıq subhan neçəyə?

Iki tümanidi qəndin kılosu şah zamanı

Görgülən indi verir dölət iran neçəyə?

Düzdü dünyada bahalıqdır; çoxalıb bizdə nufus

Satırıq nəfti vəli, biz görən əlan neçəyə?

Tökülüb sel kimi tıryak, hıro'ln, şişə, kırak

Satılır küçə xıyabanda fəravan neçəyə?

Lazımdındır gəl alım hər nəçə misqal deyəsən

At bir az qoy eləsin lap səni mizan neçəyə?

“ nafiz” in sözləri dərmani cirahətdi canım

Dəgəri vardi bu dərmani sən alsan neçəyə?

Bilirəm əl bə əl ayəndə gəzər ş'rləri

Diyəcəklər hamı gördükcə, bu divan neçəyə?