« قاراباغام !؟ »

گیلیلییم سندن وطن !

سئچیلمیش کلمه لردن سنه لاییق ، چیچکلرله هؤرولموش سؤزلر یاراندیردیم

مین لر جه سنه نامحرم تؤره میش گؤز پارچالاندیردیم.

آدینی باشیما تاج و وارلیقینا گؤوه نیب کؤلوکلرینین تؤزوندا اوزومه وار بیلب تحممول ائده

بیلمه دیم کی یاد قوشلاردا کؤکسونده سکسین.

سنه باخان چارپاز گؤزلرین  چیخماسین جانیمین تؤستوسویله ده اولموش  اوزومه ان بؤیوک

وظیفه سانیب  ایناندیم کی سن هر زامان داستامازلیسان .

گؤزوم هر زامان اتگینده چیچکلنمیش گوللره ، و اوره ییم اوره یینه تیکیلدی .

سنسیز یاشاماقی باغیشلانمامیش گوناهیلا آر بیلدیم .

زامانین ترسینه هئچ فیکیرلنمدیم و خزانین فصلینه !

سون شارکی نین ازبرلنمه سینه هئچ چالیشمادیم

سون گؤروشلر تصویرین رساملارا تاپشیرمادیم وحسرتلی ناغیللاری اؤیکوچولره .

سئوگی سیز یاشاماقی سئومه دیم گؤروشاتلی یازی .

سنی سئودیم ! ، سنه ایناندیم ! .

آمما بوگون اینانا بیلمه ییرم کی اللریم اتگیندن اوزولوب ، اونودولموشام .

اینانا بیلمه ییرم کی زامانین ترسینه دوشموشم .

گیلیلییم سندن وطن ! گیئلیلی !

طاقتیم اولمازدی کؤکسونده قایغی ، چیچکلرینده  سولماق  و گؤزلرینده قان  گؤرسه یدیم !

آمما بوگون کؤکسومده قایغی یئرینه قورشونلار چیچکلنیر .

 اوره ییم قان ، یوخ !

 جوجوقلاریم قانا بلشیب ، باجارا بیلمه میشم یارالارین باغلایام .

گؤزلرین آیدین وطن ، گؤزلرین آیدین !

یاز فصلینده چیچکلریم سارالیر و دوداقلار قورتوم سو حسرتینده سون ترپه شمه لرین مشک

ائدیب عدالتسیز زامانلا ویداعلاشیرلار.

اینانا بیلمه ییرم تارلالاریم دونقوزلارچکمه لرینین آلتیندا کؤرلاشیرلار!

اینانا بیلمه ییرم  ناتوانین باغچاسیندا  چیچکلر، قیپ قیرمیزی لالالار بئلی بؤکولور!

اینانا بیلمه ییرم خان عمیمدن خجالتم !

اینانا بیلمه ییرم میرزه رحیمدن خجالتم !

اینانا بیلمه ییرم میرزه حسن دن ، عاشیق پری دن ، خجالتم !

ایندیسه شیکسته مین یئرینه تانگلار ، آرپی جی لر سسله نیر آخی !

 گیلیلییم سندن آنا وطن !

باغرینا باسمیرساندا ، الیمدن یاپیش

آنا وطن قویما ظن ائدیم اؤگئی ییمیشم ، یادیمیشام .

اوره ییم بیرجه ده آخشام چاغی دنیز ساحیلینه داریخیب ،

 او سپ سللیملره ، اول سئوگی لی چیرپیشان  ، و قوجاقلاشان دالغالارا ،

 او مقصدلی گمیلره ،

اول شئه ویرمیش صندللره و یار یولونو گؤزله ین آلاچیقلارا.

دئدیلر ، دؤز :  دؤزه - دؤزه حسرت یاغدی گؤزلریمدن آخی !.

هارایلاردان ، شوعارلاردان و نیسگیللی اولایلاردان یورولموشام آخی آنا وطن !

اللریمی الینه آل .

اؤرتوگونو اوستومه چک .

اوشورم  آخی آنا !

یولونو گؤزله ییرم ، منه ده بایراملیق گؤندر، بایرام گؤنلری .

داها اونوتما منی .

دالغالان فیرتینالی دنیز

گیلیلی  گیلیلی  یولونو گؤزله ییرم

اودلار یوردو

ده ده قورقود یادیگاری

آنا وطن  ، آذربایجان

 امیر نصیری  ( زنگانلی ائلمان )