زنگان فولکلورو تبریزه ایشیق ساچدی

تبریزده یاییملانان ائل بیلیمی ۲۳ ایله ۲۴ جو سایی سینی یاییملادی. بو ساییلاردا اوزل اولاراق زنگان فولکلورونا یئر وئریلیبدیر. ۹۶ یارپاقدان اولاشان بو اوزل سایی نین باش یازاری محمد رزاقی دیر. بو مجموعه ده زنگانین چئشیتلی فولکلور اورنکلریندن سایین اوخوجولارا سونولوبدور.

مجموعه نین اؤن سؤزوبئله باشلانیر.

اؤن سؤز

 اؤلکه میزین باشقا تورک بؤلگه لری کیمی «زنگانین» دا زنگین بیر فولکلورو واردیر. بو فولکلور ماتریال لارینی گؤنوللو آراشدیرماجی لار چئشیتلی چاغ لاردا توپلاییب لار. توپلانان فولکلورلارین چوخو هله ده یاییملانماییبدیر.

 زنگان فولکلورو آردیجیل اولاراق، ایلک یول «ائل دیلی و ادبیاتی » آدلانان مجموعه ده ایشیق اوزو گؤردو. ائل دیلی و ادبیاتی رحمتلیک بهزاد بهزادی طرفیندن 1381 - 1386 جی ایه دک توپلام 23 سایی یاییملاندی.  بو مجموعه ده زنگانین آشیق ادبیاتیندان دستان لار، قارا ناغیل لار، یئرلی سؤزلر، بایاتی لار، آتالار سؤزو،  گله نکسل اؤیره تیم مئتودو، لای لالار، زنگان دئییمی اوزه رینه بیلیمسل یازیلار و ... یئر آلدیلار.

 بیلدیگیمیزه گؤره زنگان فولکلوروندا ابولفضل ملکی زنجانی،تئل ناز نعمتی، ثریا بخشی، جواد کریمی، حسن رفیعی، حیدر حسنلو، رضا علی کریمی، سید حیدر بیات، شعبان کریمی، علی کریمی، علی محمد بیانی، مصطفی رزاقی، محمد رزاقی  چئشیتلی چالیشمالار ائدیبلر. آنجاق گونوموزه دک ییغیلان ماتریال لار توپلوم شکلیده بیر آرادا سونولا بیلمه میشدیر.

آرتیرمالی ییق امید زنجان، بایرام، بهار زنجان، موج بیداری، همشهری (اؤزل سایی لاریندا) درگیلرینده ده زنگان فولکلوروایله ایلگیلی یازیلار یئر آلیبدیر.

 ایندیسه ائل بیلیمی نین بو سایی سیندا اؤزلجه سینه سایین اوخوجولار قوللوغونا زنگان فولکلوروندان اؤرنک لر وئریله جک. اوخوجولاریمیز بورادا زنگانین چئشیتلی یئرلریندن اولان خالق ادبیاتی ایله یاخیندان تانیش اولاجاقلار.

اوموروق گله جکده بو تور ایش لر داها گوجلو و گئنیش اولسون.

محمد رزاقی

07/05/1389 & 29/07/2010 زنگان